Maraqlıdır, yeni gənclər və idman naziri Fərid Qayıbov başda fudbol olmaqla, digər idman sahələrində mövcud problemləri aradan qaldırmaq üçün hansı islahatları həyata keçirəcək?

Məsələ ilə bağlı Sfera.az-a danışan idman eksperti Sənan Şəfizadə bildirib ki, milli komandamızın təkcə DÇ-2022-nin seçmə mərhələsindəki uğursuz çıxışları deyil, bütövlükdə ölkə futbolunun mövcud vəziyyəti bizləri ciddi düşünməyə vadar etməlidir.

"Xüsusilə bu istiqamətdə dəyirmi masa keçirilməsinə ehtiyac var. Məsələ ondadır ki, təkcə futbol üzrə milli komanda deyil, eyni zamanda gənclərdən ibrarət milli komandamızda da vəziyyət ürəkaçan deyil. Düşünürəm, elə ilk olaraq bu məsələ öz həllini tapmalıdır. Çünki gənclərdən ibarət milli komandamızın üzvləri bir ildən sonra əsas heyətdə oynamaq haqqı əldə edəcək. Onlar hələ mövcud komandada yaxşı oynaya bilmirlərsə, milli komandada necə oyanacaqlar?

Nəzərə almaq lazımdır ki, ardıcıl məğlubiyyətlər azarkeşləri futboldan küsdürə bilər. Əgər mübarizə, qələbə yoxdursa, gələcəkdə azarkeşlər milli komandanın oyunlarına ümumiyyətlə, getməyəcək. Baxın bu gün ölkə klubları Avropanın nüfuzlu çempionatlarına qatılır, qələbə qazanır. Təbii olaraq azarkeşlər də klublarımızın oyunlarına gedir. Ancaq milli komanda gözləntiləri doğrultmur. Futbol üzrə milli komandada islahatlara ehtiyac var. 

Düşünürəm, bu istiqamətdə ən yaxşı yol dəyirmi masanın keçirilməsidir. Yəni hərkəs bir masa ətrafına toplaşsın və təkliflər irəli sürsün. Düzdür, biz milli komandanın içərisində deyilik və orada nə baş verdiyini deyə bilmərik, ancaq ən azından mövcud problemlər dilə gətirilməli və bir həll yolu tapılmalıdır”.