Natiq Məhərrəmovun adı bir çoxlarımıza tanışdır. Biz onun adını daha çox ATV telekanalında yayımlanan, aparıcısı Zaur Baxşəliyevin olduğu "BizimləSən” verlişində eşitmişik. Adıçəkilən verilişdə Natiq Məhərrəmov tez-tez reklam edilərək peşəkar həkim kimi təqdim edilirdi.

Lakin bu ilk belə nümunə deyil. Təəssüflər olsun ki, bu gün Azərbaycanda efir məkanı "həkim”lərin, "dərman mafiyası"nın reklamı ilə məşğuldur. Maraqlıdır, efirdə savadlı, peşəkar adı ilə təqdim olunan bu həkimlərə nəyə əsasən belə "titul”lar verilir? Həkimlərin işi, onların bilikləri araşdırılmadan müəyyən məbləğ qarşılığında razılıq əldə edilərək efirlərə dəvət edilirlər. Həkimlərlə yanaşı bu gün biz efirlərdə ən çox rekalmı gedən məhsullar sırasında dərmanları, müxtəlif "türkəçarə” adlanan məhsulları görə bilərik. 

"Jurnalistlərin Həmkarlar İttifaqı”nın sədri Müşfiq Ələsgərli Sfera.az-a açıqlamasında bildirib ki, son zamanlar xüsusən də onlayn media qurumlarında sağlamlıqla bağlı reklam materialları yayımlanır:

 

"Dərmanlar, "türkəçarə”lər haqda reklamlar geniş yayılır. Çox təəssüflər olsun ki, bu zaman reklamla bağlı olaraq KİV haqqında qanunun tələbləri ciddi şəkildə pozulur və cəmiyyətdə yanlış tendensiya formalaşır. Reklam və KİV haqda qanuna əsasən hansısa məhsul haqda reklam gedərsə, onun reklam olduğu bildirilməlidir. Yəni, bildirilməlidir ki, KİV bu mətnin məzmununa görə məsuliyyət daşımır”. 

 

"Artıq bu ənənə geniş şəkildə yayılmağa başlayıb. Həkimlərlə yanaşı bu gün vəkillərin də təbliğatı həyata keçirilir. Onlar verilişdə daha çox işlədikləri müəssisəni və öz işlərini təbliğ edirlər. Bu zaman isə auditoriyanı özlərinə yönləndirirlər. Bu səbəbdən media qurumu bu cür mövzularda ehtiyatlı olmalı və əhalini çaşdırmamalıdır”.

M.Ələsgərlinin sözlərinə görə, bu cür şəxslərdən zərərgörmüşlər müvafiq qurumlara müraciət edərək şikayətlərini bildirməlidirlər.

"Bu gün anomal həddə efirdə tibb müəssisələrinin, həkimlərin, dərmanların reklamını görürük. İstənilən telekanalda bu cür reklamları görə bilərik. Gecə-gündüz telekanallarda dərmanların, "türkəçarə” məhsulların reklamı gedir. Bu cür reklamlar qeyri-qanunidir. Hər hansı həkimi efirə dəvət edəndə telekanal rəhbərliyi onun diplomunun olub-olmaması, işi ilə maraqlanırmı? Xeyr, təəssüflər olsun ki, bu gün telekanallarımız kommersiya fəaliyyətini önə çəkib. Bu cür fəaliyyət cinayət məsuliyyəti yaradır”.

 

"Fikir verin, həkimlər resept yazarkən öz nömrələrini də həmin kağızın üzərində qeyd edirlər. Əlbəttə ki, aptek və firmalarla əməkdaşlıq etdikləri üçün bu cür davranırlar. Yəni, xəstənin canından və pulundan istifadə edirlər”