Türkiyəyə 72 saat vaxt verildi: “Bu, müharibə elanı deməkdir”
Şiə “Heşdi Şabi” qrupuna bağlı döyüşçülər Türkiyənin İraqın Bəsrə şəhərindəki Baş konsulluğu və türk şirkətlərinə şəhəri tərk etməsi üçün 72 saat vaxt verib.
Sfera.az Türkiyə mediasına istinadən xəbər verir ki, bu barədə Bəsrədəki “Heşdi Şabi” qrupunun mətbuat xidmətindən bildirilib.
Bəyanatda bildirilir ki, Türkiyənin Mosul vilayətinin Başika qəsəbəsində hərbi qüvvəni artırması Bağdadın razılığı olmadan edilib. “Heşdi Şabi”yə bağlı şiə döyüşçülər Türkiyə zabitlərinin İraq torpaqlarına girməsini qəti şəkildə qəbul etmirlər. Bu, İraqa qarşı müharibə elanı hesab edilir”, - bəyanatda deyilir.
Qeyd edək ki, İraqın baş naziri Haydar Əl-Abadi türk əsgərlərinə ölkədən çıxması üçün 48 saat vaxt vermişdi. Türkiyə prezidenti Rəcəb Tayyib Ərdoğan isə ultimatumun heç bir halda yerinə yetirilməyəcəyini bildirib.
“Başikanın qurulmasından il yarım keçib. İnsandan soruşmazlarmı ki, bu vaxta kimi harada idiniz? Hazırda əsgərlərimizin geri çəkilməsindən söhbət gedə bilməz”, - Ərdoğan deyib.