Türkiyənin sabiq XİN rəhbəri Səməd Seyidovu müdafiə etdi
18:20 / 19.05.2018
2189
Türkiyənin keçmiş xarici işlər naziri, tanınmış diplomat Hikmət Çətin Avropa Şurası Parlament Assambleyasının (AŞPA) Prosedur qaydaları, immunitetlər və institusional məsələlər komitəsi tərəfindən korrupsiyada adı hallanan AŞPA üzvlərinə, o cümlədən Milli Məclisin deputatı Səməd Seyidova qarşı sanksiyalar tətbiq etməsini şərh edib.
Hikmət Çətin Sfera.az-a açıqlamasında sözügedən qərarın qərəzli olduğunu bildirib:
"Avropa Şurası zaman-zaman ikili standartlarla hərəkət edən qurum kimi tanınır. Mən Səməd Seyidovu tanıyıram. Onun bu yaxınlarda Strasburqda Türkiyəni açıq müdafiə etdiyini də bilirəm. Hesab edirəm ki, Avropa Şurasının Səməd Seyidova qarşı qəbul etdiyi qərar doğru deyil. Avropa Şurası Parlament Assambleyası insanların öz fikirlərini sərbəst və azad şəkildə söyləyə biləcəyi təşkilatdır. Bu cür təşkilatlarda həqarət olmamaq şərtilə hər cür fikir söylənə bilər. Ona görə də hər kəs burada edilən çıxışlara hörmətlə yanaşmalıdır".
Sabiq nazir qeyd edib ki, əgər söhbət demokratik təşkilatdan gedirsə, o zaman Avropa Şurası Səməd Seyidova qarşı bu cür qərar qəbul etməməli idi:
"Avropa Şurası hər bir insanın fikirlərinə dözümlülük nümayiş etdirməlidir, hörmət bəsələməlidir. Əks halda onun adı nə üçün demokratik qurum olmalıdır?".
Orxan Bəşirov
Sfera.az
