Sfera.az bildirir ki, müasir estrada səhnəmizə fərqli bir imic gətirə bilən, özünəməxsus bir ifa tərzi olan müğənninin 45 yaşı tamam olur. Ağayeva ad günü ilə bağlı təəssüratlarını sevənləri ilə bölüşüb. O, özünə yeni yaşının gözəlliyini, kefini çıxarmağı, dolu yaşamağı diləyib.

Xatırladaq ki, Tünzalə Ağayeva 1976-cı ilin oktyabrın 21-də Tovuz şəhərində anadan olub. Tovuzda musiqi məktəbinin piano sinfini bitirən Ağayeva daha sonra təhsilini Gəncə şəhərində Qəmbər Hüseynli adına musiqi texnikumu fortepiano sinfində davam etdirib. O, həm də Üzeyir Hacıbəyov adına Dövlət Musiqi Akademiyasında bəstəkarlıq dərsləri alıb. Hələ 12 yaşındaykən Azərbaycanın görkəmli şairi Səməd Vurğunun sözlərinə "Sən o deyilsən” adlı ilk mahnısını bəstələyib. Elə bu mahnı onun ilk albomuna da daxil edilib.

Xalq artisti 2001-ci ildə gənc ifaçılar üçün tanınmış musiqi yarışması olan "Bakı Payızı” festivalının qalibi olub. Həmin vaxtdan estrada mahnılarının bəstəçisi və ifaçısı kimi peşəkar yaradıcı fəaliyyətlə məşğuldur. Təkcə vətənində deyil, Rusiya, Ukrayna, Türkiyə, Belarusiya kimi ölkələrdə müxtəlif mükafatlara layiq görülən müğənni elə öz ad günündə - 2019-cu ildə Xalq artisti adını alıb. Yaradıcılığı boyunca bir sıra önəmli layihələr reallaşdıran ("İnsan Alverinə Son” beynəlxalq kampaniyasının video çarxında yer alıb, "Uşaqlarımıza Xoşbəxtlik Bəxş Edək” adlı layihə həyata keçirib, Oksfamın (Oxfam) "Grow-A-Vision” layihəsində iştirak edib və s.) Ağayeva həm də ictimai və xeyriyyə layihələrinin fəal iştirakçılarındandır. Sənətçi 45 illik ömrünə  "Sevdi can səni”, "Bir də baxım”, "Oxu..”, "İllərə yalvardım”, "İkimizin yerinə”, "Anam Azərbaycan”, "Özümü bilirəm” adlı albomları, "Olmuşam”, "Oxu...”, "Ölkəm”, "Sülhümüzü qoruyaq”, (insan alverinə qarşı beynəlxalq proqram çərçivəsində təşkil olunub) "Tünzalənin JAZZ Dünyası”, "Tünzalə JAZZibəsi", "İmza", "Xoş Gəldin", "ŞərhSiz" adlı solo konsertləri sığışdırıb.