Tramp adminstrasiyasının Suriya və Əfqanıstandan ordunu çıxarması bölgə dövlətlərinin əl-qolunu açacaq. Bu halda region ölkələrinin aktivləşməsini gözləniləndir.

Bu fikirləri sabiq xarici işlər naziri Tofiq Zülfüqarov deyib.

Onun fikrincə, əgər ABŞ ordusu Suriyadan çıxacaqsa, bu zaman Türkiyənin rolu və nüfuzu artacaq: "Bu gözlənilən ssenaridir. Sanki ABŞ çıxdığı bölgələri özünün müttəfiqləri ilə nəzarətdə saxlayacaq. Ancaq indilikdə biz Suriya ilə bağlı ABŞ administrasiyasının gələcək addımlarını gözləməliyik. Ordunun çıxarılacağı haqqında qərar qəbul olunub, ancaq qərarın icrası sahəsində konkret addımlar müşahidə olunmur”.

Sabiq nazir əlavə edib ki, ABŞ ordusunun Əfqanıstandan çıxarılması qərarı həyata keçsə, bu zaman bölgədə Qərbyönlü siyasətə yaxın olan Pakistanın fəaliyyəti aktivləşəcək. Onun sözlərinə görə, Tramp administrasiyasının əsas məqsədi regional problemlərinin həllində özü deyil, ona yaxın olan və həmin siyasəti həyata keçirən ölkələrin daha aktiv rol almasıdır: "İndiki mərhələni bu cür təhlil etmək olar. Amma sabah nələrin baş verəcəyini gözləmək lazımdır”.

T.Zülfüqarov hesab edir ki, ABŞ-ın Əfqanıstanı tərk etməsindən sonra Rusiyanın davranışları maraqlı olacaq: "Biz Rusiyanın hansı addımlar atacağını deyə bilmərik. Ancaq hesab edirəm ki, rusların köhnə taktikası davam edəcək. Əfqanıstanda müxtəlif dini və milli mərkəzlər mövcuddur. Nəzərə alın ki, bunlar həm də güc mərkəzləridir. Müxtəlif dini və milli mərkəzlərin özünün silahlı dəstələri, nəzarət etdikləri ərazilər var. Yəni mərkəzi hakimiyyət tam şəkildə ölkəni idarə etmir. Rusiyanın əvvəlki siyasəti belə idi ki, Əfqanıstanda olan özbək mənşəli əhali ilə əlaqələri gücləndirir, onların fəaliyyətini aktivləşdirirdi. Söhbət general Dustumun rəhbərlik etdiyi ərazi və qüvvələrdən gedir. Ruslar bu siyasətini davam etdirək. Bunun üçün pul xərcləmək də lazım gələcək. Ümumən həm Suriyanın, həm də Əfqanıstanın etnik və dini baxımdan bölünmə prosesi gözləniləndir”.Teleqraf.com