Tamblinq üzrə Azərbaycan çempionatı və Bakı birinciliyi başa çatdı - YENİLƏNİB - FOTO
17:12
Bu gün Bakıda tamblinq üzrə Azərbaycan çempionatı və Bakı birinciliyi başa çatıb.
Trend-in məlumatına görə, turnir çərçivəsində qaliblər dörd yaş kateqoriyasında müəyyənləşib: böyüklər - 1999-cu il təvəllüdlülər və daha böyüklər, gənclər - 2000-2002; yeniyetmələr - 2003-2006; balacalar - 2007 və daha kiçiklər.
Yeniyetmə yaş kateqoriyasında oğlanlar arasında yarışlarda Adil Hacızadə 59,100 ballıq ümumi nəticə ilə qızıl medal qazanıb. İkinci və üçüncü yerləri, müvafiq olaraq, Bilal Qurbanov (57,400 bal) və Elnur Məmmədov (56,500 bal) tutublar.
Balacalar arasında (2007-ci il təvəllüdlü) birinci yeri 39,900 bal toplamış Məhəmmədəli Camalov tutub. Abbas Abbasov (39,600 bal) ikinci, Enes Nərimanov isə (35,300 bal) üçüncü olub.
Gənclər arasında qızıl medala Fərid Mustafayev (59 bal) layiq görülüb. Nəcməddin Hacıyev (55,900 bal) isə ikinci olub. Böyüklər arasında yarışda Mixail Malkin (70,800 bal) birinci olub.
Balacalar yaş kateqoriyasında qızlar arasında Aliyə İsmayılova (39,600 bal) birinci olub. Yeniyetmələr arasında isə Zeynəb Qasımlı (56,300 bal) qızıl medal qazanıb.
Yarışlarda ümumilikdə 20 idmançı iştirak edib.
-----------
13:49
Bu gün Bakıda Milli Gimnastika Arenasının köməkçi zalında tamblinq üzrə Azərbaycan çempionatı və Bakı birinciliyi start götürüb.
Sfera.az Trend-ə istinadən bildirir ki, yarış çərçivəsində Bakı Gimnastika Məktəbinin 20 idmançısı akrobatik cığırda çıxış edəcək.
Artıq 14-cü dəfə baş tutacaq tamblinq üzrə yarışlarda qaliblər dörd yaş kateqoriyasında müəyyənləşəcək (böyüklər - 1999-cu il təvəllüdlülər və daha böyüklər, gənclər - 2000-2002; yeniyetmələr - 2003-2006; balacalar - 2007 və daha kiçiklər).
