Sərnişinlərin həyatını təhlükəyə atan 156 saylı marşrut xətti ilə bağlı hansı tədbir görüləcək? - BNA-dan AÇIQLAMA
13:18 / 21.05.2018
2876
"Agentlik tərəfindən mütəmadi olaraq daşıyıcılarla keçirilən görüşlərdə sürücülərə göstərişlər verilir, xəbərdarlıq edilir. Yay mövsümündə bu cür hallara daha çox təsadüf edilir”.
"Memar Əcəmi" metrosundan Höküməli qəsəbəsi istiqamətində hərəkət edən 156 saylı marşrut xətti avtobusunun qapısı açıq şəkildə hərəkətinə münasibət olaraq Bakı Nəqliyyat Agentliyinin mətbuat katibi Mais Ağayev Sfera.az-a açıqlamasında belə deyib.
M.Ağayev dəfələrlə bu cür hallarla rastlaşdıqlarını söyləyib:
"Təəssüflər olsun ki, hələ də bu cür hallarla rastlaşırıq. Dövlət yol polisi tərəfindən bu cür hallara qarşı mübarizə aparılır, müəyyən inzibati tədbirlər görülür”.
M.Ağayev bildirib ki, eyni hal bir daşıyıcıda dəfələrlə təkrarlanarsa, bu zaman müqavilənin bağlanmasına yenidən baxılması məsələsi gündəmə gələcək:
"Sürücü ilə bağlı daşıyıcı tərəfindən addım atılmalıdır. Çünki o sürücünü işə götürən də daşıyıcıdır. Məqsədimiz sürücünü işdən çıxartmaq yox, onu tənbeh etməkdir”.
Nigar Məhərrəm
Sfera.az