“Sərhəddə nəzarəti gücləndirməliyik” – Tanınmış həkim koksaki virusunun hansı ölkədən gəldiyini açıqladı
"Koksaki virusunun yaratdığı dərin təsirlərin fərqində olmadığımız halda, ola bilər ki, həmin viruslar bir müddət sonra hansısa yeni xəstəliyin əsasını qoysun”.
Sfera.az-a açıqlamasında bu sözləri Azərbaycanda, xüsusən uşaqlar arasında bədəndə səpki, ishal, qusma simptomları ilə müşayiət olunan koksaki virusu xəstəliyinin yayılması və onun mümkün təhlükələri barədə danışırkən tibb elmləri doktoru Adil Qeybulla deyib:
"Koksaki virusu Azərbaycana Ukraynadan keçib. Virus həyatın qeyri-hüceyrəvi formasıdır. İstər qrip, istərsə də virusun digər növləri olsun, bütün bunlar orqanizmə, genlərə dağıdıcı təsir göstərir. Virusların hər bir ştamının insan sağlamlığına müxtəlif cür təsirləri olur”.
Həmsöhbətimiz koksaki virusuna qarşı mübarizədə sərhəd nəzarətini gücləndirməyi tövsiyyə etdi: "Bu cür infeksiyalar yayılanda ilk növbədə sərhəd zonalarında nəzarəti gücləndirməliyik. Elə bir şərait yaratmalıyıq ki, belə şübhəli xəstəliklər mümkün qədər Azərbaycan sərhədini keçməsin. Bu xəstəliyə tutulanları karantində saxlamaq lazımdır. Çünki, infeksiya həmişə olmur. Baş verən halda isə dediyim tədbirlər görülməlidir”.
Həkimə görə belə hallarda xəstələr izolyasiya olunmalıdır: "Onun digərlərinə keçməsinin qarşısını almaq üçün dərhal izolyasiya olunmalıdırlar. İstənilən belə infeksiyalar zamanı yüksək hərarət, ümumi halsızlıq və s. nəzərə çarpır. Bunlar olduğu halda həmin şəxslər digərlərini yoluxdurmamaq üçün mütləq izolyasiya olunmalıdırlar. Yəni, karantin tədbirləri görülməlidir. Bu kimi tədbirlər görülməsə, həmin infeksiyanı lokallaşdırmaq mümkünsüzdür. Nəticədə də böyük insan qrupu belə virus xəstəliyinə tutulur. Hətta koksaki virusu zamanı bəzən müəyyən fəsadları, ağırlaşmalar qalır. Onun yaratdığı dərin təsirlərin fərqində olmadığımız halda ola bilər ki, həmin viruslar bir müddət sonra hansısa bir xəstəliyin əsasını qoysun. Ona görə də bu məsələdə diqqətli olmaq lazımdır. Qarşıdan qış fəsli gəlir və bu dövrdə həmin infeksiyanın yenidən artması təhlükəsi gözlənilir. Gürcüstan, digər qonşu ölkələr, habelə Avropadan belə infeksiyalar daxil ola bilər. Bir ara quş qripi də məhz bu şəkildə yayılmışdı. Yalnız Ümumdünya Səhiyyə Təşkilatının köməyilə onu lokallaşdırmaq mümkün oldu. Təəssüflər olsun ki, koksaki virusuna ölkədə nə qədər insanın tutulduğu barədə bir söz deyə bilməyəcəyik. Rəsmi statistika da bəzən dəqiq demir”.
Elçin
Sfera.az