Bu barədə Publika.az-a Dövlət Fitosanitar Nəzarəti Xidmətindən məlumat verilib.

Məlumatda bildirilib ki, son günlərdə həyata keçirilən müayinələr zamanı qarpızlarda nitratların miqdarının 37 mqkq, yemişdə isə 72mqkq olduğu məlum olub.
 

Müqayisə üçün bildirək ki, qarpızlarda nitratların norması 60 mqkq, yemişdə isə 90mqkq-dır. Sevindirici haldır ki, müayinələr zamanı məhsullarda insan sağlamlığı üçün təhlükə yaradacaq ağır metalların və pestisid qalıqlarının miqdarına rast gəlinməyib.

Dövlət Fitosanitar Nəzarəti Xidməti istehlakçıları bostan məhsulları alan zaman məhsulun xarici görünüşünə diqqət yetirməyə dəvət edir. Əzik, çatlamış, çürüməyə məruz qalmış məhsullar almaq, eyni zamanda məhsulu soyuducuda uzun müddət saxlamaq olmaz. Əgər düzgün temperatura riayət olunmaqla, məhsul soyuducuda saxlanılarsa və istifadə olunarsa, insan orqanizmi üçün heç bir təhlükə yarana bilməz.

Məlumatda o da vurğulanıb ki, yerli istehsalın artması həm İran və Türkiyə mənşəli qarpız və yemiş məhsullarının respublikaya idxal olunmasının azalmasına, həm də ölkəmizin ixrac potensialının artmasına səbəb olub. Təkcə iyun ayı ərzində 57,5 ton qarpız, 16 ton yemiş məhsulu Rusiya Federasiyasına ixrac olunub.