Sadiq Qurbanov seçicilərlə görüşlərini davam etdirir
YAP-ın ilk üzvlərindən biri, 54 saylı Şabran-Siyəzən seçki dairəsindən namizədliyi irəli sürülən Sadiq Qurbanov seçiciləri ilə görüşlərini davam etdirir.
Hazırda Şabran rayonunda olan Sadiq Qurbanov özünün sosial şəbəkə hesabında yazır: "Bu günümüz də çox məhsuldar keçdi. Səhər saat 10:00-dan başlayaraq, 18:20-yə qədər Şabran rayonunun Pirədəbil, Zeyvə, Sumaqova, Qazma, Zöhramı, Kilvar, Taxtalar və Dağ Bilici kəndlərinin sakinləri ilə görüşdük. Abdulhüysen müəllimə, Dilarə xanıma, Çingiz müəllimə, Qalib müəllimə, Adil muəllimə, Əlirza müəllimə, Pərvanə xanıma, Xuraman xanıma, Allahverən müəllimə və bütün sakinlərə təşəkkür edirəm. Sizin Prezidentimiz İlham Əliyevə, Mehriban xanıma isti münasibətiniz, dövlətimizə dəstəyiniz məni qürurlandırır. Belə qədirbilən olmağınıza görə sağ olun!”
Qeyd edək ki, Sadiq Qurbanov 90-cı illərin əvvəllərində – BDU-da təhsil alarkən aktiv şəkildə Heydər Əliyevin müdafiəsinə qoşulub. O, parlamentin qarşısında Heydər Əliyevin seçkidə iştirakını əngəlləmək üçün tətbiq olunmuş yaş senzi əleyhinə aksiyaların təşkilatçılarından və fəal iştirakçılarındandır.
Sonrakı illərdə YAP-ın mərkəzi qərargahında, Əmək və Əhalinin Sosial Müdafiəsi Nazirliyində, həmçinin müəllim kimi Bakı Dövlət və İqtisad universitetlərində işləyib. Hazırda SOCAR-da çalışır.