Sabir Rüstəmxanlı Əli Kərimliyə CAVAB VERDİ: \"Arxamca danışılanlar əsassızdır\"
15:37 / 06.05.2019
2272
2000-ci ildə Qüdrət Həsənquliyev və Əli Kərimli arasında hansı müzakirələrin getdiyini deyə bilmərəm.
Vətəndaş Həmrəyliyi Partiyasının sədri Sabir Rüstəmxanlı müxalifət cəbhəsində gedən son müzakirələrlə bağlı Redaktor.az-a açıqlama verib. S.Rüstəmxanlı bildirib ki, keçmişdə baş verən hadisələrin uzun-uzadı müzakirəsinin müxalifət düşərgəsinə nə verdiyini başa düşmür:
"Müxtəlif dövrlərdə və mərhələlərdə hər zaman boykot çağırışları olub. Parlament seçkilərindən əvvəl və sonra, seçki müzakirə olunanda bu çağırışlar aktual idi. Mən həm Əli Kərimli, həm də başqa müxalifət partiya sərdləri ilə müzakirələrdə demişəm ki, Azərbaycanda boykot mexanizmi yoxdur. Rəhbəri olduğum Vətəndaş Həmrəyliyi Partiyası hər zaman seçkilərə, parlamentə qatılmağın tərəfdarıdır”.
S.Rüstəmxanlı qeyd edib ki, həmin dövrdə Qüdrət Həsənquliyevlə Əli Kərimli arasında gedən söhbətlərdən xəbəri olmayıb:
"Çünki bu, Xalq Cəbhəsi Partiyasının daxilində gedən müzakirələrdir. Onlar hansı mərhələdə nə qərar qəbul ediblər, sonradan necə fikir dəyişdiriblər o barədə heç nə deyə bilmərəm”.
Rüstəmxanlı Əli Kərimlinin parlamenti boykot etmək barədə sənədə imza atmasının səbəbkarı kimi onu göstərməsinə də münasibət bildirib:
"Mən sənədə imza atıb-atmayacağımı heç kimə deməmişəm. Arxamca danışılanlar əsassızdır. Bir daha deyirəm, kiminsə mənim arxamca ağır söz deməsi, mənə görə addım atmağa məcbur olduğunu iddia etməsi əsassızdır, yanlışdır. O, sadəcə olaraq, mənim mövqeyimi düzgün çatdırmayıb”.
S.Rüstəmxanlı bildirib ki, artıq gələcəyə baxmaq lazımdır:
"Biz çox ağır yollardan keçmişik. Ona görə də, artıq gələcək haqqında düşünməliyik. Ölkəmizin problemləri hələ də həll olunmamış qalır, torpaqlarmızın bir hissəsi işğal altındadır. Məsuliyyəti bir-birinin boynuna atmaqdansa, problemin həlli ilə bağlı düşünmək lazımdır”.
Xatırladaq ki, Bütöv Azərbaycan Xalq Cəbhəsi Pariyasının (BAXCP) sədri, millət vəkili Qüdrət Həsənquliyev BayMedia-ya açıqlamasında bildirib ki, 2000-ci ilin parlament seçkilərindən sonra Əli Kərimli Milli Məclisə düşə bilməyən digər partiyalarla birlikdə, parlamenti boykot etmək barədə sənədi imzalamağa hazırlaşırdı. Lakin sonradan Əli Kərimli sənədi imzalamayacağına söz verdi:
"Amma bir neçə saatdan sonra geri döndü və heç nə deməmiş rəngindən başa düşdüm ki, sənədi imzalayıb. Soruşdum niyə imzaladın? O Sabir Rüstəmxanlı barədə ağır ifadə işlədərək dedi ki, mən elə bilirdim o imzalamayacaq, mən də ona istinad edib imzalamayacağam. Amma o da imzalayandan sonra mənim başqa yolum qalmadı”.