Moskvanın Vaşinqtonun viza sanksiyalarına qarşılıq veriləcəyi istisna edilmir.

Sfera.az-ın Rusiya mətbuatına istinadən xəbərinə görə, artıq rəsmi Moskva Birləşmiş Ştatlara qarşı məhdudiyyətlərə start verməyə hazırlaşır.

"Viza müharibəsinə başlayacağıqmı?” sualının cavabı olaraq deyə bilərəm ki, müharibə artıq gedir və bu müharibəni ABŞ özü qızışdırıb”,- bunu mətbuata açıqlamasında XİN başçısının müavini Sergey Ryabkov deyib.

Diplomat qeyd edib ki, dəfələrlə amerikalı həmkarlarına "gözə göz, dişə diş” prinsipi ilə hərəkət etməkdən əl çəkib, razılığa gəlməyi təklif ediblər.

"Hələ ki, alınmır. Görünür, ABŞ-da Rusiya siyasətini müəyyən edib formalaşdıranların dəyərləri bizdən fərqlidir. Görünür, onlar bizimlə güclərinə arxalanaraq danışmağa cəhd edirlər. Amma bu yanaşmanın uğursuzluğa məhkum olduğu çoxdan hər kəsə məlumdur”, - deyə, Rusiya rəsmisi məsələyə aydınlıq gətirib.

Xatırladaq ki, bir müddət öncə Rusiya XİN-in rəsmi nümayəndəsi Mariya Zaxarova bildirmişdi ki, BMT-nin xətti ilə ABŞ-da keçiriləcək tədbirlərdə iştirak etməli olan Rusiya nümayəndə heyətinin bəzi üzvləri "texniki səbəblərə görə” viza ala bilməyiblər.

Rusiya Xarici İşlər Naziri Sergey Lavrov isə vizaların verilməməsini rüsvayçılıq adlandırıb. Nazir müsahibəsində xatırladıb ki, 2018-ci ildə Moskva Vaşinqtona tərəf addım ataraq, amerikalı həmkarlarının xahişi ilə Rusiyanın sanksiya siyahısında olan senator Ron Consonu da Rusiyaya gələn nümayəndə heyətinin tərkibinə daxil edib.

Lavrov vurğulayıb ki, amerikalısiyasətçilər Rusiyanın bu addımına qarşılıq verəcəklərini vəd etsələr də, bu il Vaşinqtonda bəyan ediblər ki, "qara siyahı”dakı istənilən nümayəndəyə viza verilməsi "qətiyyən mümkün deyil”.

Diplomat bunu "Amerika müstəsnalığı”nın kədərli nümayişi adlandırıb. O, həmçinin Vaşinqtonun vizalarla bağlı qərarından sonra ABŞ-a "sürpriz” edəcəklərinə də söz verib.

Selcan