Ailə, Qadın və Uşaq Problemləri üzrə Dövlət Komitəsinin sədri Hicran Hüseynova da belə bir addım atıb. Amma o, əsasən kommersiya fəaliyyəti ilə məşğul olan, maddi gəlir əldə edən xanımlarla bayramlaşıb.

Bu isə ictimai sektorda xidmət göstərən bəzi QHT rəhbərləri tərəfindən birmənalı qarşılanmayıb.

"XXI Əsrin Qadınları” İctimai birliyin sədri Mahirə Əmirhüseynova komitə sədrinin bu addımının ədalətli olmadığını bildirib:

"Sahibkar xanımların mükafatlandırılmasına etiraz etmirəm, lakin təltif olunan qadınların yalnız bu təbəqədən seçilməsi insanda bəzi şübhələr də yarada bilər. Sahibkar xanımlar biznes fəaliyyəti ilə məşğul olan qadınlardır. Onların mükafatlandırılması da bu sahəyə aid olan nazirliyin səlahiyyəti ola bilər. Lakin hər il 8 Mart-Beynəlxalq Qadınlar günü ərəfəsində Ailə, Qadın və Uşaq Problemləri üzrə Dövlət Komitəsi cəmiyyət arasında xüsusi fəallığı ilə seçilən xanımları kənarda qoyur”.

 

 "Biz bu mükafat olmazsa belə, dövlətçiliyimizə xidmətmizdə fəaliyyətimizi davam etdirəcəyik. Lakin dövlət komitəsindən gözlədiyimiz odur ki, qadınlara münasibətdə birtərəfli mövqe nümayiş etdirməsin, obyektiv olmağa çalışsın.

Azərbaycan Respublikasının Prezidenti İlham Əliyev qadınların rolunu hər zaman xüsusi qeyd edir. Prezident İlham Əliyev qadınların cəmiyyətdəki roluna və yerinə, onların dövlət idarəçiliyində təmsil olunmalarına, irəli çəkilmələrinə diqqətlə yanaşır” – deyə Əmirhüseynova bildirib.

 

"Qadın Liderliyi Uğrunda” İctimai Birliyin sədri Ülkər Abdullayeva da Mahirə Əmirhüseynovanın Ailə, Qadın və Uşaq Problemləri üzrə Dövlət Komitəsinin sədri Hicran Hüseynovanın kommersiya fəaliyyəti ilə məşğul olan, maddi gəlir əldə edən xanımları mükafatlandırması ilə bağlı səsləndirdiyi fikirlərə qatıldığını bildirib.

"Ailə, Qadın və Uşaq Problemləri üzrə Dövlət Komitəsi gördüyümüz işləri görməzdən gəlir. Bizi öz tədbirlərində görməyi arzu etmir, bizimlə əməkdaşlığa əsla can atmır. Bunun qısqanclıq, yoxsa saymamazlıq olduğunu deyə bilmərəm. Ola bilər ki, bu Komitə rəhbərliyinin ayrı-ayrı təşkilatlara münasibətindən qaynaqlanır. Ola bilər ki, bizi sevmirlər, qiymətləndirmirlər, öz işləridir. Amma xatırlatmaq istəyirəm ki, Ailə, Qadın və Uşaq Problemləri üzrə Dövlət Komitəsi kiminsə atasının şəxsi mülkiyyətində deyil. Bu, bir dövlət qurumudur, həm də biz vətəndaşların, QHT-lərin çalışaraq ödədiyi vəsaitlərdən formalaşmış büdcədən maliyyələşir. Onlar bizimlə işləməyə, bizi dinləməyə, fikir və təkliflərimizlə hesablaşmağa borcludurlar” – deyə Abdullayeva bildirib.

 QHT sədri Komitə rəhbərliyinin qadın təşkilatlarına üstdən aşağı baxdığına təəssüfünü ifadə edib:

"Təəssüf ki, mən Komitə rəhbərliyinin bizə yuxarıdan aşağı baxdığını müşahidə etmişəm və bunun səbəbini bilmirəm. Sadəcə, düşünürəm ki, Komitə rəhbərliyi dövlət başçısının onlara göstərdiyi etimaddan sui-istifadə etməməli, özlərini hakimi-mütləq kimi aparmamalıdırlar. Bu vaxta qədər AR Prezidenti yanında QHT-lərə Dövlət Dəstəyi Şurası bizim təşkilatın qadınlara yönəlik 7 layihəsini dəstəkləyib. Amma qadın təşkilatları ilə birbaşa işləməli olan Ailə, Qadın və Uşaq Problemləri üzrə Dövlət Komitəsi heç vaxt bizimlə əməkdaşlığa can atmayıb, layihələrimizi dəstəkləmək barədə heç düşünməyib də. Bu isə sözügedən qurumun necə işlədiyini bariz göstəricisidir”.

"Əsgər Ailələrinə Dəstək” İctimai Birliyinin sədri Mətanət Əsgərqızı da diqqətdən kənarda qaldıqlarını deyir: "Bir ictimai birlik rəhbəri kimi mənim də mənəvi dəstəyə ehtiyacım var. Çünki həssas qruplllarla işləmək və onların problemlərini həll etmək heç də asan deyil. Mənim kimi ictimai sektorda çalışan güclü xanımlar var. Amma nədən ildə bir dəfə yüksək səviyyədə keçirilən tədbirlərdə bizlər dəvət almırıq.

 

Nədən cənab Prezidentə təltif üçün təqdim olunan siyahılarda bizlər adımızı görmürük? Nəhayət, bitsin bu ayrı-seçkilik, tanışlıq qohumluq məsələləri. Ailə, Qadın və Uşaq Problemləri üzrə Dövlət Komitəsi bizi hərdən tədbirlərə zalda yer doldurmaq üçün dəvət edir. Həmçinin digər qurumlar da elə onlardan geri qalmırlar. Bizlərin daha səmərəli fəaliyyətimiz üçün məhz bizə diqqətin artırılması çox vacibdir. Amma görünən odur ki, bunu hərə öz tanıdığına edir”.

Mətanət Əsgərqızı  dövlət başçısının ictimai sektorda çalışan xanımlarla görüşməsini arzu etdiklərini bildirib:

"Cənab Prezident, xahiş edirik, üçüncü sektordakı qadınlarla görüşün. Biz qadın hüquqları və ailələrdəki vəziyyətlə bağlı problemləri Sizə birbaşa çatdırmaq istəyirik!”