Novxanı bələdiyyəsinin sədri: \" Müxalifyönlü şəxslərlə məsləhətləşdim\"
11:40 / 30.01.2019
2929
Novxanı Bələdiyyəsinin sədri Şahin Tağıyev Məhəmməd Əmin Rəsulzadənin oğurlanmış xatirə lövhəsinin yerinə asılmış barelyeflə bağlı açıqlama verib.
"Biri dedi Xalq Cümhuriyyəti olmalıdır, biri dedi Demokratik Cümhuriyyət olmalıdır. Biri dedi ki, Xalq Cümhuriyyətinin qurucularından biridi, digəri dedi yox, qurucusudur. Biz də bu söz-söhbəti kəsmək üçün belə yazmağa qərar verdik", Novxanı bələdiyyəsinin sədri Şahin Tağıyev Məhəmməd Əmin Rəsulzadənin oğurlanmış xatirə lövhəsinin yerinə asılmış barelyeflə bağlı danışan bələdiyyə sədri bildirir ki, yeni xatirə lövhəsini asarkən "hətta müxalifyönlü şəxslərlə" də məsləhətləşib.
"Müxtəlif adamlardan soruşdum. Mənə belə məsləhət gördülər, elə yazdırdım, bu dəfə də dedilər yox, belə səhvdir. Mən də bu sual-cavabdan qaçmaq üçün dedim ki, Məhəmməd Əmini kim tanımır ki?"
Şahin Tağıyev deyir ki, Məmməd Əmin Rəsulzadənin "titullarını yazmaq üçün üç dənə o ölçüdə barelyef gərəkdir". Ona görə də qısa yazmağı üstün tutublar.
Azərbaycan Xalq Cümhuriyyətinin banisi Məhəmməd Əmin Rəsulzadənin barelyefi ötən həftə doğulduğu evin divarından oğurlanıb. Onu oğurlayan iki nəfər isə cinayət məsuliyyətinə cəlb olunub.
Xatirə lövhəsinin oğurlanmasına sosial media istifadəçilərinin etirazından sonra, həmin yerə yeni barelyef qoyulub.
Lakin qoyulmuş barelyefin üzərindəki məlumatlar yazılarkən yanlışlara yol verildiyi üçün abidə təkrar dəyişdirilib.
Bu dəfə isə barelyefin üzərində sadəcə Rəsulzadənin adı və neçənci ildə doğulması əks olunub.bbcnews
