Diqqətimizi cəlb edən əsas məqam o oldu ki, bu gün yarmarkada müşahidə olunan insanların çoxluğuna rəğmən, demək olar ki, "Təzə bazar” da alıcı gözə dəymirdi.

Satıcılar isə alverin olmamasından, bəzi məhsulları daha baha təklif etməyə məcbur olduqlarını və Bakı sakinlərinin daha çox şəhərin mərkəzində yerləşən supermarketlərdən alış-veriş etdiklərini deyiblər.

Hətta, satıcılar iddia edirdi ki, belə getsə, imkanı zəif olan vətəndaşlarımız bayramı qeyd etməyəcəklər. Satıcılardan biri əməkdaşımıza bildirib ki, əsasən günortaya qədər alıcıların sayı kifayət qədər olurdu.

"Bu gün isə görürsüz, saat artıq 12-yə işləyib, amma alıcı yoxdur”, - deyə bazar satıcılarından Rüstəm dayı qeyd edib.

Hər nə qədər satıcıların bu iddialarına qulaq assaq və bazardakı mənzərə ilə tanış olsaq da, ilk olaraq bayramın əsas atributlarından biri hesab olunan səməninin qiyməti ilə maraqlanmaqla, bazarı gəzməyə başladıq.

Bu bazarda təklif olunan səmənilər böyüklüyünə və müxtəlif formada olduqlarına görə yarmarkadakıdan fərqlənirdi. Belə ki, satıcı Aqilin bildirdiyinə görə, alıcılar əsasən 1 manatlıq səməni almağa üstünlük verirlər.

"Ən ucuz səməni 50 qəpikdir, amma onu alıcılar bayram süfrəsinə deyil, qəbir üstlərinə qoymaq üçün alırlar”, - deyə Aqil əməkdaşımıza deyib.

Bazarda, həmçinin 5, 8, 10, 20 manata təklif olunan səmənilərə belə rast gəlmək olardı. Bu səmənilər isə qeyd etdiyimiz kimi ölçüsünə görə digərlərindən fərqlənirdi.

Məsələn, buta deyilən səməni 10 manata satılır. Daha balacaları isə 8 manata, gəmi deyilən səməni isə 2 manata təklif olunur.

Qeyd edək ki, yarmarkada şamın bir bağlaması 30 qəpik, 3 bağlaması isə 1 manat idi.
Bazarda cəmi bir alıcı gözümüzə sataşdı. Ona isə qiymətlərdən razı olub-olmaması ilə bağlı sual ünvanladıq.

Elə alıcı sualımıza ironiya ilə cavab verərək bildirdi ki, "Nə görmüşəm, nə eşitmişəm”. Sonra bazarda başqa alıcı tapmaq istəsək də, bu istəyimiz sözün əsil mənasında, müşkülə döndü.

Daha sonra, bazardakı müşahidələrimiz davam etdirməyə başladıq.

Göyərtinin demək olar ki, bütün növlərinin bir dəstəsi 20 qəpik, tərxun isə 1 manat satılırdı.

Balıqlar növlərindən asılı olaraq 10-15-20 manat idi.

Ən ucuz təklif olunan isə ilanbalığı idi - 1 dənəsi 1 manat.

Satıcının dediyinə görə, alıcılar ən çox kütüm balığı alırlar.

"Kütümün kiloqramı isə 10 manatdır”, - deyə satıcı deyib.

Portağal kiloqramı 1 manat 80 qəpik idi.

Satıcı bildirib ki, əvvəl onu 1 manat 50 qəpiyə satırdı, indi isə daha baha aldığından qiyməti qaldırmağa məcbur olub. 

Alıcılardan bir neçəsi Oxu.Az-a bildirib ki, bu il bayram süfrəsi üçün daha az vəsait xərcləyəcəklər.

"Bayram süfrəsini açmaq mənə təxminən 150 manata başa gələcək”, - deyə alıcı Sərxan dayı deyib.

Ümumiyyətlə, bazar və yarmarkalardakı vəziyyət ilə tanışlığımız və qiymətlər ilə bağlı monitorinqlərimiz göstərir ki, təxminən 200 manata Novruz süfrəsini təşkil etmək olar.

Təbii ki, bu qiymətə Novruzun əsas simvollarından olan təbii şirələri, şirniyyatı, salatları və s. əlavə etsək, qiymət daha da qalxa bilər.