“Niyə bu qədər uşaq doğmusan?” deyən icra başçısı cəzalanmalıdır - RƏYLƏR
"Bu hərəkət insanın şəxsi həyatına və insan hüquqlarına müdaxilədir və qeyri-etik davranışdır”.
Sfera.az-a açıqlamasında bu sözləri Tərtər rayonunun icra başçısı Müstəqim Məmmədovunrayonun Buruc kəndindən üçəmləri olan ailənin problemlərini dinləmək əvəzinə, utanmadan "niyə bu qədər uşaq doğursan?” deyərək vətəndaşı təhqir etməsinə münasibət bildirərkən hüquqşünas Ələsgər Əhmədoğlu deyib:
"Çox biabırçı vəziyyətdir. Belə hərəkətə yol verən icra başçısının həm siyasi, həm də hüquqi məsuliyyəti var. Hüquqi davranışını bilməyən, başqa insanların özəl həyatına kobud şəkildə müdaxilə edən şəxs necə vəzifədə qala bilər? Bəzi icra hakimiyyəti başçıları və digər məmurların vətəndaşlarla belə kobud rəftar etməsi şəxsiyyətin xarakterilə bağlı olan məsələdir, burada ortaya formalaşmış şəxsiyyətlə formalaşmamış şəxsiyytin fərqi çıxır. Yəni, problem icra başçısı vəzifəsinə bağlı deyil, şəxsiyyət məsələsidir”.
İctimai-siyasi xadim Bəxtiyar Hacıyev hesab edir ki, bu yeni problem deyil və hakimiyyətin ya bilərəkdən, ya da bilməyərək kadr siyasətinin həddən artıq yanlış olduğunun göstəricisidir:
"Ən azından son 10 ildə bir çox icra hakimiyyəti başçıları və digər məmurların vətəndaşlarla kobud davranmalarının şahidi olmuşuq. Bəzi yerli icra hakimiyyəti başçıları özlərini kiçik padşah kimi aparır.Bir çoxları da müxtəlif resursları qanunsuz olaraq mənimsəyərək varlanıblar. Son aylar ərzində bir neçə rayonun icra başçısına qarşı əməliyyatlar keçirildi və onlar məsuliyyətə cəlb olundular. Ancaq sonradan bu proses dayandı. Beləliklə, icra başçılarının simasında hakimiyyətin kadr siyasətinin nə qədər yanlış olduğunu gördük. İcra başçıları vətəndaşlarla dil tapmalı, onların problemlərini dinləyib həll etməli olduqları halda, vətəndaşları təhqir edirlər. Nəticədə bir rayonda vətəndaşlar icra başçısının evini yandıracaq qədər qəzəblənir, başqa rayonda icra başçısı qarşıdurmaya səbəb olur. Bu kimi problemlər köklü şəkildə həllini tapmalıdır”.
Elçin
Sfera.az