İqtİsadİyyat

Neftin qiyməti 65 dollar olacaq – EKSPERTDƏN AÇIQLAMA

Neftin qiyməti 65 dollar olacaq – EKSPERTDƏN AÇIQLAMA
 

"Birdən-birə bu qiymətin 72-dən 68 dollara düşməsi o deməkdir ki, neft bazarında balans yoxdur və o istənilən vaxt pozula bilər”


Sfera.az-a açıqlamasında bu sözləri neftin qiymətinin bir gündə kəskin düşərək 72-dən 68 dollara enməsinə münasibət bildirərkən neft və qaz məsələləri üzrə mütəxəssis Zəfər Vəliyev deyib.


Həmsöhbətimiz onu da əlavə etdi ki, neftin qiymətinin 70 dolları keçməsi obyektiv amillərlə bağlı deyildi:

"İstənilən vaxt bu qiymətlərdə azalmalar olacaq. Məsələ ondadır ki, neft ehtiyatları kifayət qədərdir. ABŞ-ın kommersiya təyinatlı neft ehtiyatları da durmadan artır. Eyni zamanda, dünyanın digər məkanlarında, həm Avropa, həm də Asiya bazarlarında kommersiya təyinatlı neft ehtiyatlarında azalmalar müşahidə olunmur. Əksinə, artımlar var. Digər tərəfdən, Çinlə ABŞ arasında ticarət müharibəsinin davam etməsi neftin qiymətini təhdid altına alan faktorlardan biridir. Bu müstəvidə OPEK daxilində də vahid fikirlər yoxdur. Habelə, Vyana sazişi iştirakçılarının bəzilərinin iyun ayından sonra hasilat həcminin azaldılması ilə bağlı sazişin müddətini ilin sonuna qədər uzadılmasına münasibətləri birmənalı deyil. Qurumun son Ciddə görüşündə bu bir daha aydın oldu. Belə ölkələrdən biri də Rusiyadır. Belə olan halda ilin sonuna qədər neftin qiyməti təhdid altında olacaq”.

 

Ekspert neft istehsalçılarını qiymət arxasınca qaçmamağa səslədi:

"Hazırda neft hasil edən ölkələr qiymət dalınca qaçırlar ki, bu da doğru yanaşma deyil. Onlar bazarda balansın və ağırlıq mərkəzinin formalaşmasına fikir verməlidirlər. Belə olarsa, neftin qiyməti 65 dollarda qərar tutacaq. Bu qiymət həm neft hasil edən, həm də idxal edən ölkələrin tam olaraq maraqlarına uyğundur. Qiymətin 70-72 dollar olması isə o deməkdir ki, bazara süni təsirlər var. Süni intervensiyalar isə son anda neftin qiymətinin kəskin düşməsinə səbəb olur. Birdən-birə bu qiymətin 72-dən 68 dollara düşməsi o deməkdir ki, bazarda balans yoxdur və o istənilən vaxt pozula bilər. İndi əsas məsələ bu istiqamətdə balansın bərqərar olmasıdır. Bu baş vermədiyi təqdirdə, neftin qiymətində daima dalğalanmalar olacaq”.


Qeyd edək ki, dünənə qədər dünya bazarında neftin qiyməti 72-73 dollar civarında var-gəl edirdi. Son gün isə bu qiymətlərdə kəskin azalma baş verdi. Bir gün ərzində neftin qiyməti 4 dollar azalaraq 58 dollara düşdü.

Elçin

XƏBƏR LENTİ

«    Sentyabr 2019    »
B.eÇ.aÇC.aC.Ş.B
 1
2345678
9101112131415
16171819202122
23242526272829
30