Regionların inkişafı, paytaxtla bölgələr arasında sosial-iqtisadi fərqlərin aradan qaldırılması, işsizliyin və yoxsulluğun azaldılması hər bir ölkə üçün əsas problemlərdəndir.

Bu sözləri iqtisadçı alim Vüqar Bayramov regionlar və paytaxt arasındakı fərqin aradan qaldırılması üçün görülən mərhələli işləri şərh edərkən deyib. O bildirib ki, regionların sosial-iqtisadi inkişafı dövlət siyasətinin prioritetinə çevrilib.

"Hazırda regionların iqtisadi inkişafı aktual mövzulardandır. Post-neft dövrünə keçdiyimiz üçün əsas məqsəd balanslı iqtisadiyyatın həyata keçirilməsidir. Balanslı iqtisadiyyata malik olmaq da nəticə etibarı ilə regionlar və Bakı arasındakı fərqin aradan qaldırılması baxımından vacibdir. Əgər diqqət yetirsək, artıq ölkədə keçirilən müşavirələrin böyük əksəriyyətinin regionlarda təşkil olunduğunu görərik. Son zamanlar Azərbaycan Prezidenti İlham Əliyevin sədrliyi ilə Yevlaxda, Şəki-Zaqatala bölgəsində respublika müşavirələri təşkil olunub. Hazırda regionlarda infrastrukturun yaradılması və investisiyaların cəlb olunması üçün planlı şəkildə işlər aparılır. Ancaq nəzərə almalıyıq ki, bu, zaman alan bir prosesdir. Regionlar və Bakı arasında iqtisadi fərqi aradan qaldırmaq xeyli çətin olsa da, artıq görülən mərhələli işlər öz nəticəsini verir. Mövcud layihələrin, dövlət proqramlarının və xüsusən də bölgələrdə ənənəvi sektorların inkişafı üçün dəstəklənməsi prosesi davam etdirilir”.