Tacikistanın paytaxtı Düşənbədə məhkəmə ölkənin məşhur müğənnisi Firuzə Hafizovanı 5 min somoni (500 dollardan çox) cərimə edib.

Yerli mətbuatın məlumatına görə, buna səbəb müğənninin öz ad gününə bir neçə həmkarını dəvət etməsi olub. 

Qonaqlıq barədə videosüjet internetdə yayıldıqdan sonra, onu televiziyada da nümayiş etdiriblər.

Tacikistanın ənənələr, mərasimlər haqqında qanununa əsasən, vətəndaşlar ad gününü yalnız ailə üzvləri ilə keçirə bilərlər və tədbirə dostlarını, müğənniləri dəvət edə bilməzlər. Bundan başqa ad günündə heyvan kəsintisi də qadağan edilir.

Qanun 2007-ci ildə qəbul edilib. Prezident Emomali Rəhmon bəyan edib ki, böyük toy və yas mərasimləri ailələr üçün ağır yükə çevrilir.

Qanun təmtəraqlı ad günləri, korporativ tədbirləri, məktəblərdə şənlik yığıncaqlarını, toyları, banketləri, yas mərasimlərini tənzimləyir. Belə ki, toya dəvət edilən qonaqların sayı 150 nəfərdən artıq ola bilməz, toyun özü isə 3 saatdan artıq keçməməlidir. Şadyanalıq saat 18:00-a qədər davam edə bilər.