Milyonluq villada adı hallalan Bakı Şəhər Dövlət Yol Polisi İdarəsinin İctimaiyyətlə əlaqələr bölməsinin rəisi, polkovnik-leytenant Vaqif Əsədov Sfera.az-a açıqlamasında heç kimdən heç nə gizlətmədiyini bildirib.

"Mən hər zaman media işçiləri ilə dostluq etmişəm. Bunu yazan mənə paxıllıq edir və qərəzli mövqe sərgiləyir. Məni gündəmdə saxlayan media "dost"larımı seçməyə başlayıram. Kimin evində yaşayıram, yaşadığım evin sənədi kimin adınadır bəllidir. Həmin sayt yaxşı olardı ki, ayda nə qədər kirayə pulu verdiyimi maraqlanardı. Yalandan məlumat yayıb milləti qıcıqlandırmasınlar. Həmin villanın da kimin adına olduğunu araşdırsınlar. Jurnalistlər üçün nəzərdə tutulan evlərə min nəfər sənəd verib. Gedib onların haqqında araşdırma aparsınlar. Ev hamıya lazımdır", -deyə V.Əsədov əlavə edib.

Qeyd edək ki, Ölkə.az saytı sözügedən villanın fotolarını çəkməyə nail olub. Sözügedən 3 mərtəbəli bahalı villa paytaxtın Babək prospektinin üzərində yerləşir. Villanın qiymətinin milyon manatdan çox olduğu deyilir. Sözügedən villanın Vaqif Əsədova məxsus olmasını qonşular da təsdiq edib.