Millət vəkili Zahid Oruc Sfera.az-a açıqlamasında bildirib ki, İkinci Dünya Müharibəsindən sonra mühacirət hərəkatı üzərindən mənfəətlərini təmin edən, bu kimi adamları əllərində saxlayan, bu insanlardan dövlətlərin əleyhinə istifadə edən, onları öz siyasi maraqlarının alətinə çevirən mərkəzlər, kəşfiyyat strukturları və dövlətlər var. Millət vəkili hesab edir ki, bu, özfəaliyyət deyil:

"Belə şəxslərin dillərindən səslənən fikirlər onların özlərinə məxsus deyil. Həmin adamların uğurlu ictimai-siyasi fəaliyyətləri də yoxdur. Bu adamlar ən sadə zəhməti belə çəkməyiblər. Bir ağac belə əkməyiblər. Onlar yaradıcı insanlar deyillər. Yəni, faydalı iş əmsalı mənfi formalaşan şəxslər xarici dairələrin əllərində alətə çevrilirlər. Berlindən Strasburqa qədər özlərinə lövbər salan və özlərinin tərbiyəsizlikləri ilə platforma düzəltikdlərini deyənlər, müxalifətin totalitar təfəkkürlü hissəsini çox yaxşı xarakterizə edirlər. Həmin adamların adlarını çəkmək istəmirəm, onlar buna layiq deyillər. Həmin şəxslər radikal, ekstremist simalardır. Belə adamlar Əli Kərimlinin inqilabi barrikadası tərəfindən stimullaşdırılırlar, tirajlanılır, bəyənilir, "laykomaniya xəstəliyi”nin içində onlara yer verilir. Göründüyü kimi, təhqir onlar üçün platformadır, mübarizə üsuludur, mənəvi anatomiyasıdır. Baxın, görün ki, Azərbaycan hakimiyyətinin alternativi kimdir. Belə qüvvələrin əllərində hakimiyyət imkanları olsaydı, öz alternativlərinin hamısını məhv edərdilər”.

Zahid Oruc qeyd edib ki, son illərdə Azərbaycan hakimiyyəti məlum şəbəkələrin xarici maliyyə mənbələrinə zərbə vuran kimi, onlar ölkənin kənarlarına açılmağa başladılar:

"Onların ölkə daxilində heç bir fəaliyyəti yoxdur. Onlar bir şəxsin "qara qutusunun içindəki teatr” kimi öz oyunlarını səhnələşdirirlər, bunu da "müxalifət fəaliyyəti” adlandırırlar. Özlərini klaviatura arxasında göstərən bu şəxslər son dərəcə qorxaq, mahiyyətcə cılız adamlardır. Hər birimiz onlara "dur” deməliyik. Onlar təkcə xalqı yox, dövlətin milli təhlükəsizliyini təhdid edirlər. İstənilən an bu dövlətə zərbə vurmağa hazırdırlar. Mükafatları bir qədər də artırılsa, daha da dərinə gedəcəklər. Gördük ki, Emin Hüseynov və Leyla Yunus Azərbaycandan gedən ermənilərin haqları uğrunda mübarizə aparırlar. Sabah həmin adamlar Arkadi Qukasyan, yaxud Robert Köçaryanın haqları uğrunda mübarizə aparsalar, təəccüblənməyin. Bu kimi adamları azadlığa buraxan kimi ermənilər tərəfdə istehkam düzəldib Azərbaycana qarşı mübarizə aparacaqlar. Antimilli ünsür sözü bunların sifətinə yaxşı yapışır, bu söz onların boyunlarına biçilib”.