“Mənim şəhid olduğumu anama deməyin”-23 yaşlı şəhid kapitan
13:25 / 07.04.2019
15930
Qarabağ savaşı minlərlə igid Azərbaycan oğlunun şəhid olması ilə nəticələndi. Onlar öz amalları, vətənə sevgiləri üçün savaşda idilər. Vətənin dar günündə Azərbaycana qayıdıb, silaha sarılan oğullardan biri də 23 yaşlı kapitan Saleh Musayev idi.
Saleh Musayev 7 aprel 1970-ci ildə Yevlax şəhərində anadan olmuşdu. 1976-cı ildə Yevlax şəhər 4 nömrəli məktəbə daxil olan Saleh , 1985-ci ildə bu məktəbin IX sinfini əla qiymətlərlə başa vurur. 1985-ci ildə Bakıda yerləşən fizika-riyaziyyat təmayüllü liseyə daxil olur. 1987-ci ildə həmin məktəbi bitirərək Ukraynanın Poltava şəhərində yerəşən general N.F.Vatutin adına Zenit-Raket Komandirlər məktəbinin Quru qoşunlarının havadan taktiki müdafiəsi ixtisasına qəbul olunur. O arzularını gercəkləşdirmək yolunda bütün çətinliklərə dözürdü. 1991-ci ildə radio mühəndisi ixtisası ilə leytenant rütbəsində məktəbi bitir. Elə həmin ilin 23 iyun tarixində SSRİ Müdafiə Nazirliyinin 0641 nömrəli əmri ilə Poltavada 35705 saylı hərbi hissədə tağım komandiri vəzifəsinə təyin edilir.Amma Qarabağdakı savaş Salehin həyatını dəyişməyə məcbur edir. Bir neçə dəfə Azərbaycana göndərilməsi üçün müraciət edir. Sonda öz qərarını verir, rus ordusunda xidmətdən imtina edərək Azərbaycan ordusuna yazılır. O Gəncə şəhərində yerləşən 732 saylı hərbi hissəyə tabor komandiri təyin edilərək ön cəbhədə döyüşlərə göndərilir. İlk döyüşlərini Goranboy cəbhəsindən başlayan Saleh Ağcakənd, Başkənd və bir sıra məntəqələrinon azad edilməsində fəal iştirak edir. Daha sonra Ağdam rayonunun Sırxavənd kəndinin azad edilməsində aktiv rol oynayır.
Azərbaycan Ordusunun 1992-ci iliyin iyununda başladığı əks-hücumunda Saleh və batalyonu da aktiv iştirak edir. Marquşavan, Həsənqaya, Gödəkburunun azad edilməsində müstəsna xidmətləri olur. 1992-ci il 14 noyabr tarixində Ağdərənin Çıldıran kəndi uğrunda gedən qeyri-bərabər döyüşdə Saleh son anadək döyüşü idarə edir. Döyüş zamanı atışma mövqeyini dəyişərkən minaya düşür.
Yoldaşları cəsədini çətinliklə də olsa qarlı döyüş meydanından çıxara bilirlər. Kəskin qan itirmədən vəfat edir. Ölümündən öncə:”Mənim şəhid olduğumu anama deməyin”-deyərək gözlərini əbədi yumur. Doğulduğu Yevlax şəhər Şəhidlər Xiyabanında dəfn edilib.
Saleh Musayev ölümündən cəmi iki gün öncə kapitan rütbəsi ilə təltif edilmişdi.
Yevlaxda yaşadığı küçə də hal-hazırda onun adını daşıyır. Gəncə şəhər Kəpəz Hərbi Komissarlığının şəhidlər lövhəsində də şəkli var. Şəhid olan zaman Tərtər şəhər 703 saylı hərbi hissənin zabiti idi. 1991-ci ildə ailə qurmuşdu, bir oğlu var idi.
Saleh Musayev şəhid olduqdan sonra haqqında dövrün bir sıra mətbu orqanları yazmışdır. Onlardan biri də Xəlil Rza Ulutürkün oğlu şəhid Təbriz Xəlilbəylinin həyat yoldaşı Sevinc Xəlilbəylinin qəzetdə yazdığı məqalədir:
"Saleh Musayevin 23 yaşı var idi. Belə gənc olmasına baxmayaraq, Vətən uğrunda savaşlarda oddan-alovdan keçmişdi. Torpaqlarımızı erməni işğalçılarından təmizləyən qəhrəman oğullarımızdan biri, mənim ömür-gün yoldaşım Təbrizin silahdaşı, cəbhə dostu idi.
Saleh noyabrın 14-də Ağdərə bölgəsinin Çıldıran kəndi ətrafındakı döyüşlərdə qəhrəmancasına həlak oldu. Mənə elə gəldi ki, təkcə Təbrizimin dostunu yox, öz doğma qardaşımı itirdim. Amma təsəllim odur ki, torpaq uğrunda vuruşub torpağa gömülən bu igid oğulları, ərləri vətənimiz Azərbaycan bütün xalqımız zaman-zaman bir qələbə bayrağı kimi öz başı üzərinə qaldıracaq.”
