Məktəbə işçi qrupu göndərildi, 3 gündür 10 yaşlı uşağın problemini həll edə bilmirlər
21:35 / 29.11.2017
1505
Nəsimi rayonu 14 saylı məktəbin "3 C” sinfinin valideynləri hələ də uşaqlarını məktəbə göndərmirlər. Onlar həmyaşıdları ilə aqressiv davranan Məhəmmədhəsən Sadıqzadənin "3E” sinfindən "3C” sinfinə keçirilməsinə etiraz ediblər. Bakı şəhəri üzrə Təhsil İdarəsi isə problemi həll etmək üçün məktəbə işçi qrupu göndərib.
Bu barədə virtualaz.org-a idarənin mətbuat katibi Bəşarət Məmmədov bildirib.
B.Məmmədovun sözlərinə görə, həm uşaqlarla, həm də valideynlərlə psixoloji iş aparılır. "Məktəbin psixoloqu və işçi qrupuna daxil olan psixoloqlar şagirdlərlə, onların valideynləri ilə söhbət aparırlar. Məqdəs uşaqlar zərər görmədən problemi həll etməkdir. Qiymətləndirmədən sonra qərar veriləcək”.
Mətbuat katibi əlavə edib ki, mütəxəsislərin qiymətləndirilməsindən sonra uşağın başqa məktəbə köçürülüb-köçürülməməsinə qərar veriləcək. "Yəqin ki, valideynlər də qərarla razılaşacaqlar. Bizim üçün ilk növbədə uşaqlardır, onların zərər görməməsidir. Valideynlərə də başa salmağa çalışırıq ki, heç bir uşağın hüququ pozulmasın. İşçi qrupunun rəyi açıqlanacaq, bundan sonra qərarla hər kəs tanış olacaq”.
Hələliksə 3 gündür problem həllini tapmayıb.
Qeyd edək ki, valideynlər Məhəmmədhəsən Sadıqzadənin həmyaşıdlarını döydüyünü, çantasında kəsici alət gəzdirdiyini, paltarını soyunaraq uşaqlara bədənini göstərdiyini deyirlər. M.Sadıqzadənin valideynləri isə övladına qarşı ayrı-seçkilik edilməsi ittihamı ilə polisə şikayət edib.
Sfera.az