Azyaşlıların valideynləri tərəfindən döyülməsi cəmiyyətimizdə tez-tez rastlaşdığımız problemlərdən biridir. Uşaqlara şiddət yad insanlar tərəfindən tətbiq edildikdə, həmin insan cəzalandırılır. Bəs, uşaq öz valideyni tərəfindən şiddətə məruz qaldıqda, qanunlar necə işləyir? Belə valideynlər hansı məsuliyyətə cəlb olunur? Hansı hallarda onlar valideynlik hüququndan məhrum edilə bilər?

Qanunvericiliyə əsasən, valideynlər uşaqlarının istismarına, təhqir edilməsinə, mənəviyyatının alçaldılmasına, qəddarlığa, kobudluğa və biganəliyə yol verə bilməz. Övladının hüququnu tapdalayan, ona qarşı zorakılıq tətbiq edən valideynlər isə qanunla məsuliyyətə cəlb olunurlar. Ən pis halda isə bu valideynlər valideynlik hüquqlarından məhrum edilirlər. Valideynlik hüquqlarından məhrumetmə Azərbaycan Respublikası Ailə Məcəlləsinin 64-cü maddəsi ilə tənzimlənir. 

Valideynlik vəzifələrini yerinə yetirmədikdə;

Alimenti qəsdən ödəmədikdə;

Heç bir üzürlü səbəb olmadan uşağı doğum evindən və yaxud hər hansı müalicə, tərbiyə və digər analoji müəssisələrdən götürməkdən imtina etdikdə;

Valideynlik hüquqlarından sui-istifadə etdikdə;

Uşaqlara qarşı məişət zorakılığı etdikdə;

Xroniki alkoqol və narkomaniya xəstəsidirsə;

Uşaqların və ya ərinin (arvadının) sağlamlığına və ya həyatına qarşı qəsdən edilmiş cinayət törətdikdə.

Bəs, valideynlik hüquqlarından məhrumetmə necə tətbiq olunur

Ailə Məcəlləsinin 64-cü maddəsində müəyyən edilmiş valideynlik hüquqlarından məhrumetmə hallarından biri və ya bir neçəsi müəyyən edildikdə valideynlik hüquqlarından məhrumetmə haqqında qətnamə çıxarılır. Qətnamə qanuni qüvvəyə mindikdən sonra 3 gündən gec olmayaraq həmin qətnamədən çıxarış müvafiq icra hakimiyyəti orqanına göndərilir.