Jurnalist Həmkarlar İttifaqının sədri, Azərbaycan Mətbuat Şurasının sədr müavini Müşfiq Ələsgərli gender bərabərliyi mövzusunda jurnalistləri təlimatlandırıb. Gender balansının mahiyyəti, faydaları, dünyada gender balansının mövcud mənzərəsi, media sferasında gender balansının durumu haqqında məlumat verilib.

Jurnalistlərin Peşə Davranışı Qaydaları və informasiya qanunvericiliyinin gender balans mövzusuna yanaşması haqda danışılıb. 

 

Ekspert gender balansının dünyadakı mənzərəsi haqda danışaraq bildirib ki, bu gün dünyanın ən inkişaf etmiş ölkələrindən biri olan İngiltərədə belə qadınlarla kişilər arasında əmək haqqında 18 faiz fərq var:  

"BMT tərəfindən hazırlanan hesabata görə, dünyada gender balansı 68-32 nisbətində kişilərin xeyrinə dəyişilir. Öncələr isə bu nisbət 62-40 olaraq dəyərləndirilib. BMT hesabatına görə, Azərbaycan 144 ölkə sırasında gender bərabərliyinə görə 80-cı yerdə qərarlaşıb. Lakin bu qərəzli bir yanaşmadır". 

M.Ələsgərli mobil telefon və internetdən istifadəyə görə qadın-kişi nisbətindən danışıb:  

"Mobil telefon istifadəsinə görə istifadəçi kişilərin sayı qadınlardan 6 faiz yüksəkdir. İnternetdən istifadəyə görə isə qadınlar kişilərdən 11 faiz irəlidədir".