Dövlət Sərhəd Xidmətinin məlumatına görə, yanvarda ölkəmizə 191,4 min xarici vətəndaş gəlib ki, bu da ötən ilin eyni dövrü ilə müqayisədə 5 min nəfər və ya 3% çoxdur. Əcnəbilər arasında ən çox artım Gürcüstandan gələnlərdə müşahidə olunur. Əhəmiyyətli surətdə artım olan digər bazarlar Cənubi Asiya və Orta Asiyadır. Ən yüksək artım tempi Cənubi Asiya ölkələri olan Pakistan və Hindistana, Mərkəzi Asiyadan Qazaxıstan və Türkmənistana məxsusdur. 

Novruz bayramı ərəfəsində, eləcə də, bayram günlərində, həmçinin Formula 1 yarışları zamanı Azərbaycana gələn turistlərin sayında əhəmiyyətli artım gözlənilir. 

Turizm Azərbaycan üçün gəlirli sahələrdən biri olsa da, turistlərin sayının artması, Azərbaycana səyahət şərtlərinin sadələşdirilməsi ölkədə turizm təhlükəsizliyi məsələsini də gündəmə gətirib. Uzun müddət təhlükəsizlik orqanlarında çalışmış Arzu Nağıyevin fikrincə, daxili işlər və xüsusi xidmət orqanları bununla bağlı tədbirlər görməlidir. 

Arzu Nağıyev hesab edir ki, ölkəyə turist gətirən turizm şirkətləri də gələn turistə görə cavabdehlik daşımalıdır. Azərbaycan Turizm Assosiasiyasının rəhbəri Nahid Bağırov isə bununla razılaşmır. O, hesab edir ki, hansısa turistdən gözlənilən təhdidi ortaya çıxarmaq, bunun qarşısını almaq dövlət orqanlarının işidir. 

Azərbaycan qanunvericiliyinə görə, ölkədə 15 gündən artıq müvəqqəti qalmaq istəyən əcnəbilər və ya vətəndaşlığı olmayan şəxslər olduğu yer üzrə qeydiyyata alınmalıdırlar. Qeydiyyat üçün əcnəbi ölkəyə gəldiyi vaxtdan 15 gün ərzində elektron qaydada Dövlət Miqrasiya Xidmətinin rəsmi saytının elektron xidmətləri, elektron hökumət portalı və elektron poçt vasitəsilə və ya şəxsən regional miqrasiya idarələrinə, yaxud "ASAN xidmət" mərkəzlərinə müraciət edilməlidir. 

2018-ci il ərzində 740 min 841 əcnəbi və vətəndaşlığı olmayan şəxs olduğu yer üzrə qeydiyyata alınıb.