Körpənizin başında bunu hiss etdikdə... – Valideynləri vahiməyə salan vəziyyətlə bağlı PEDİATR TÖVSİYƏSİ
12:22 / 24.05.2018
7284
"Valideynlərin tez-tez ünvanladığı suallardan biri də budur ki, övladımın başı niyə istidir. Uşağın başının isti olması normaldır. Termometriniz normal bədən temperaturunu göstərirsə, amma siz yenə də "bəs niyə başı istidir" deyib narahat olursunuzsa, bilin ki, heç bir problem yoxdur. Başın isti olmasının səbəbi qan dövranının burada daha çox olmasıdır. Həm böyüklərdə, həm də uşaqlarda başdakı duyğu üzvləri, beyin, üzün dərisi və s. çox güclü qan təchizatına malikdir”.
Bu sözləri pediatr Aytən İsmayılzadə Sfera.az-a açıqlamasında deyib.
O bildirib ki, uşaqlarda mübadilə prosesi sürətli getdiyindən başda istilik daha çox hiss olunur:
"Uşaqların ürək döyüntüsü də çox olur. Uşaq sürətlə inkişaf etdiyi üçün bu əlamətlər normaldır. Bədən böyüdükcə aşağı ətraflarda və bədəndə qanın paylaşması dəyişir və istilik az hiss olunur. Başa qanın çox gəlməsinin səbəbi isə beyin və duyğu neyronları ilə bağlıdır. Buradakı hüceyrələr digərləri kimi yenilənmək qabiliyyətinə malik deyil. Ölməmək üçün onların hər zaman mayeyə ehtiyacı var. Başın qanla daha çox təchizatına digər nümunə isə səpkilərin ilk olaraq üzdə, başda görülməsidir. Övladınızın başının isti olması normaldır”.
Nigar Məhərrəm
Sfera.az
