Tarixə nəzər salsaq görərik ki, könüllülük fəaliyyəti ilə ilk dəfə XVII əsrdə Fransa ordusunda təzahür edib. XX əsrdə isə dünyada yayılmağa başlayıb. Azərbaycanda isə könüllülük hərəkatında yüksəliş ulu öndər Heydər Əliyevin hakimiyyətə qayıdışından sonraya təsadüf edir.

Bu, gələcəyimiz olan gənclərimiz üçün bir nurlu işıq yolu oldu. Gənclər bu cığırla gedərək daha düzgün istiqamətdə olduqlarının fərqinə vardılar. Çünki bu yol onlara kömək etməyi, dərdlərə məlhəm olmağı, yağışda çətir, qaranlıqda ziya olmağı öyrətdi. 

Bu yolun sonu işıqlı sabah, aydın səma, əzəmətli Azərbaycan və gözəlliklərə qərq olmuş Vətəndir. Biz bu yolu tərtəmiz vicdanla addımlamalı, açıq alınla yolumuza davam etməliyik. Vətənə sədaqət və vəfamızı etibarlı əməllərimizlə sübut etməliyik. 

Könüllülük həm də xeyirxahlıq deməkdir. Yardım etməyin nə qədər ülvi hiss olduğunu gənclərin dərk etməsi və özlərindən sonrakı gənclərə bu cür örnək olması təqdirəlayiq hal, alqışlanası davranışdır. Könüllülər adı özü bir azadlıq toxumudur sanki. Heç bir məcburiyyət olmadan bu toxumu əkib, böyüdüb, becərib və gözəlləşdirmək könüllü gənclərin öhdəsinə düşür. Vətəndaşlarla ünsiyyət, onlara xidmət, dövlət, özəl qurumların yaxından öyrənilməsi həm də potensiallı kadrların yetişməsi deməkdir. Bununla yanaşı, Azərbaycanın beynəlxalq nüfuzunun artması, ölkəmizdə müxtəlif sahələrdə beynəlxalq tədbirlərin təşkili könüllülük fəaliyyətini daha da zəruri edir. Onlarla beynəlxalq səviyyəli tədbirdə Azərbaycandan on minlərlə gənc könüllü kimi iştirak edib.

Beləliklə, könüllülük fəaliyyəti hər bir gəncin uğurlu fəaliyyətinin başlanğıcı, həyatının dönüş nöqtəsidir...