"İstehsalı həyata keçirmək və prosesi idarə etmək üçün mütəxəssislərin olmaması ərzaq buğdasının daxili imkanlar hesabına təminatına imkan vermir”.

Bu sözləri Sfera.az-a açıqlamasında Azərbaycanın hələ də ərzaq buğdasına olan tələbatı idxal hesabına ödəməkdə davam etməsinə münasibət bildirərkən aqrar sahə üzrə mütəxəssis Vahid Məhərrəmov deyib:

"Azərbaycanın daxili imkanlar hesabına ərzaq buğdası ilə təminatı istiqamətində aparılan işlər imitasiya xarakterlidir. Bu sahəyə subsidiya formasında ayrılan maliyyə resursları məmurlar tərəfindən mənimsənilir. Digər tərəfdən, daxili istehsal hesabına ərzaq buğdası ilə təminatla bağlı maddi-texniki bazanın möhkəmlənməsi istiqamətində də hər hansı ciddi addımlar atılmayıb. Yeni məhsuldar sortların yaradılması istiqamətində işlər görülmür. Əldə olunan məhsulun kondisiyaya çatdırılması, çeşidlənməsi istiqamətində işlər görülmür”.

Həmsöhbətimiz bildirib ki, aydiyyatı quruma rəhbərlik edənlər mütəxəssis olmadığından ərzaq buğdası sahəsində ciddi dönüş olacağını gözləmir:

"Kənd Təsərrüfatı Nazirliyində çalışan yüksək ranqlı məmurların heç biri bu sahə üzrə mütəxəssis deyil. Kənd təsərrüfatı naziri və müavinlərindən biri hüquqşünasdır, digər müavin isə tikinti üzrə mütəxəssisdir, başqa biri də aqrar sahəyə aid olmayan iqtisadçıdır.Ərzaq buğdası ilə bağlı yaşanan problem də əsasən məhz buradan qaynaqlanır. Yəni, quruma rəhbərlik edənlər peşəkar deyilsə, ərzaq buğdası sahəsində də nəyəsə nail olmaq mümkün deyil. Bütün ölkələrdə kənd təsərrüfatı nazirləri bu sahənin adamlarıdır. Avropa ölkələrinin əksəriyyətində kənd təsərrüfatında çalışanlar fermerlər aqronomlar, heyvandarlıqla məşğul olanlar da baytar həkimləridir. İndilikdə bu sahədə dağınıqlıq, pərakəndəlik, qeyri-peşəkarlıq hökm sürür. Qeyri-peşəkarlar isə bu işin öhdəsindən gələ bilmir. Məsələyə kompleks yanaşmalıyıq. Topraqlar münbitliyini itirir. İstehsal vasitələrinə olan tələbat ödənilmir. Gübrə qaydasında verilmir, üzvü gübhə isə ümumiyyətlə verilmir. Növbəli əkin sisteminə riayət olunmur, su təminatı lazımınca həyata keçirilmir. Keyfiyyətsiz toxumdan istifadə olunur. Kifayət qədər texnika olmadığından yığım gecikir.Aqrotexniki qaydalara əməl olunmadığından bitki zəif olur. Deyə bilərəm ki, gələcəkdə də ərzaq buğdası ilə daxili imkanlar hesabına təminat öz həllini tapmayacaq. Odur ki, Azərbaycan özünün ərzaq buğdasına olan tələbatını idxal hesabına ödəməyə məcburdur”.

Elçin