İstehsalın azalması və gömrük sistemindəki şəffaflaşma qıtlığının yaranmasına səbəb olub-ekspert
15:15 / 05.02.2019
3455
"Ölkədə heyvandarlıq məhsullarının qıtlığının yaranmasını vergi sistemində tətbiq edilən şəffaflıqla əlaqələndirməyi düzgün hesab etmirəm”
Sfera.az-a açıqlamasında bu sözləri son günlər marketlərdə süd və süd məhsulları üzrə qıtlığın yaranması və satış şəbəkələrinin bunun səbəbini Vergilər Nazirliyinin bütün sahibkarları şəffaf vergi ödəməsinə cəlb etməsi fonunda xərclərinin artması ilə əlaqələndirmələrinə münasibət bildirərkən Liberal İqtisadçılar İctimai Birliyinin sədri Akif Nəsirli deyib:
"Sahibkarların şəffaf vergi ödənişinə cəlb edilməsilə bağlı qanunvericilik qəbul olunsa da, ərzaq məhsullarının istehsalı ilə əlaqədar burada elə də ciddi dəyişiklik yoxdur. İkinci bir tərəfdən, hazırda vergi tətbiqinin şəffaflaşdırılması istiqamətində qanun qəbul olunsada, bu istiqamətdə hələlik real ciddi addımlar atılmayıb. Bu mənada da ticarət obyektlərində əslində süd və süd məhsullarının qıtlığının yaranması heç də sahibkarlar üçün şəffaf vergi sisteminin tətbiqi məsələsilə bağlı deyil.
Bu mənada ölkədə heyvandarlıq məhsullarının qıtlığının yaranmasını vergi sistemində tətbiq edilən şəffaflıqla əlaqələndirməyi düzgün hesab etmirəm. Son illər bilirsiniz ki, Azərbaycanda heyvandarlıq sahəsi müəyyən dərəcədə inkişafdan qalıb. Heyvanlar üçün otlaqlar azalıb. Həmin otlaqlar indi tütün və pambıq istehsalçılarının ixtiyarına verilib. Nəticədə heyvandarlıqla məşğul olan fermerlərin sayı azalıb. Nəticədə ölkəmizdə süd və süd məhsulları üzrə istehsal da azalır.
Marketlərdə həmin məhsullar üzrə qıtlığın yaranmasının başlıca səbəbi heyvandarlığa marağın azalmasından qaynaqlanır. Başlıca səbəb budur. Digər tərəfdən süd və süd məhsulları təkcə heyvandarlıq mənşəli deyil. Bakıda çoz az hallarda təbii süd satışına rast gəlmək olar. Bu məhsulun əksər hissəsi süni olaraq quru süddən hazırlanan məhsullardır. Hansı ki, onun da ölkəyə idxalında müəyyən dəyişiklik var. Yeni rüsumlarla bağlı olaraq ola bilsin müəyyən mənada idxal məhdudlaşdırılıb. Gömrük sistemində son zamanlar ciddi şəffaflaşma işləri aparılır. Belədə əvvəllər qeyri-qanuni şəkildə, vergi ödəmədən keçirilən məhsullar indi artıq rüsumlara cəlb olunur və qanuni yolla ölkəyə buraxılır. Marketlərdə sözügedən prosesin baş verməsində bu amilin də təsiri ola bilər. Yəni yerli istehsalın azalması və idxal prosesində şəffaflığın gücləndirilməsi ola bilsin marketlərdə satılan süd və süd məhsulları üzrə qltlığın yaranmasına gətirib çıxarıb”.
Qeyd edək ki, artıq bir neçə gündür paytaxtın böyük super marketlərində və kiçik ərzaq mağazalarında bir sıra yerli süd və süd məhsullarının satışı məsələsində qıtlıq problemi yaşanır. "Araz" super marketlər şəbəkəsinin Bayıl ərazisində yerləşən mağazasında süd məhsulları şöbəsi işçisinin bildirdiyinə görə, bu ildən yerli süd istehsalçıları mağazalara məhsul satışını azaldıb, bəzi məhsullarının satışını isə tamamilə dayandırıblar. Həmin işçinin dediyinə görə, səbəb Vergilər Nazirliyinin bütün sahibkarları şəffaf vergi ödəməsinə cəlb etməsidir: "Süd və süd məhsulları istehsalçılarının dediyinə görə, düzgün uçot sistemi onların xərclərini artırıb. Ona görə də məhsullara hələ yeni qiymət müəyyənləşdirməyiblər. Bu səbəbdən də yeni ildən süd və süd məhsulları istehsalçılarından yeni mal almamışıq. Ona görə də vitrinimiz boşdu. Olanların da çoxu xaricdən idxal olunan süd məhsullarıdır".
ELÇİN
