İqbal Ağazadədən atalara müraciət: “Qızlarımıza sahib çıxaq!”
"Son günlər Cəlilabad və Zaqatalada körpə qızların intihar hadisələri bizi sarsıtdı. Zorla ərə verilməyə etiraz edən fidan balalarımız canlarına qəsd edirlər”.
Sfera.az xəbər verir ki, bunu Ümid Partiyasının sədri İqbal Ağazadə deyib. Atalara müraciət edən İ. Ağazadə onları qızlarımıza sahib çıxmağa çağırıb:
"Bəlkə analar ailə dəyərlərinə, mental xüsusiyyətlərə görə qızları müdafiə edə bilmir, sosial vəziyyətin ağırlığından qurtarmaq üçün körpə qızları ərə verməyi tək çarə hesab edirlər, sizlərdən çəkinir, qorxurlar.
Əziz atalar! Qızlarımızla dost olaq, dinləyək, istəmədikləri adamla 17-18 yaşlarında ailə qurmasına icazə verməyək, ümumiyyətlə yaş fərqi olmadan bu cür zorla ərə getməyə məcbur etməyək. Hər bir qızın ata nəvazişinə, qayğısına böyük ehtiyacı var. Atalar qızlara sahib çıxanda fidan körpələrimiz ayaqlarını yerə daha bərk basa bilir, yaxşı övlad, vətəndaş, ən başlıcası, gözəl ana olurlar.
Lütfən, övladlarımızın yanında olaq, onları baş tacına çevirək. Hər bir atanın da onun yanında olacaq bir qız balaya ehtiyacı var. Heç bir şey qız balalarımızdan və onların talelərindən önəmli deyil!
Qızlarımızı qoruyaq!”.