Sfera.az-a açıqlamasında bu sözləri "Azəriqaz”ın Çindən mexaniki qaz sayğacları alacağına dair sosial şəbəkələrdə yayılan fikirlərə münasibət bildirərkən iqtisadçı ekspert Natiq Cəfərli deyib:

 

"Bütün dünya artıq elektron sayğaclar sisteminə keçib. Hətta indi dünyada mobil telefonlar vasitəsilə distansion olaraq sayğacların idarə olunması qaydaları tətbiq olunur. Yəni bu proses də müasir texnologiyalardan istifadə olunmaqla öz həllini tapır. Evdə mexaniki olaraq sayğaca heç bir müdaxilə etmədən, sayğacın göstəricilərinə nəzarət etmək, mobil telefon və ya bank kartı vasitəsilə ora pul yükləmək, davamlı şəkildə təchizatı təmin etmək üçün indi geniş imkanlar yaranıb. Bu da onu göstərir ki, daha keyfiyyətli və daha üst texnologiyalı sayğaclara keçid əvəzinə mexaniki sayğaclara üstünlük verməyimiz təbii ki, məntiqli və doğru deyil. Həmçinin, bu hal keyfiyyət göstəriciləri baxımından daha geriyə getməyimizə bir işarədir. Belə vəziyyətin yaranmasında yeganə səbəb köhnə qaydalardır. Çindən ucuz mal alıb, onu baha rəsmiləşdirməklə müəyyən korrupsiya mexanizmlərindən istifadə etmiş olacaqlar. Bu isə doğru deyil və gələcəkdə daha böyük problemlərə yol aça bilər. Əhalinin qaz təminatında sayğacların keyfiyyətsiz olması, tez-tez xarab olmaları, detalların dəyişdirilməsi kimi problemlər yaradacaq. Nəticədə onun servis xidməti də daha baha başa gələcək”.

 

Qeyd edək ki, "Azəriqaz” gələn aydan başlayaraq Çindən mexaniki qaz sayğacları alacaq. Bu isə o deməkdir ki, sözügedən qurum yenə də sayğaclarla bağlı keyfiyyət göstəriciləri aşağı olan, dünyada müsbət mənada tanınmayan bir ölkəyə müraciət edəcək. Halbuki hazırkı dünya ən müasir və keyfiyyət stardartları yüksək olan elektron sayğaclar sisteminə keçib.