Nəsimi rayonu ərazisindən qaçırılan "Mersedes” markalı avtomobilin axtarışını həyata keçirən 21-ci Polis Bölməsinin əməkdaşları maraqlı halla qarşılaşıblar.

Sfera.az xəbər verir ki, oktyabrın 5-də saat 2 radələrində DİN-in "102 Zəng Xidməti”nə Nəsimi rayonu ərazisindən avtomobil qaçırılması barədə məlumat daxil olub. Hadisə yerinə gələn Nəsimi Rayon Polis İdarəsi 21-ci Polis Bölməsinin əməkdaşları tərəfindən müvafiq araşdırma aparılıb və Bakı şəhər sakini Fərid Quliyevə məxsus "Mersedes” markalı avtomobilin Mərdanov qardaşları küçəsindən qaçırıldığı məlum olub.

Görülmüş tədbirlərlə avtomobil Ə.Topçubaşov küçəsində əzilmiş vəziyyətdə aşkar edilib. Onu idarə edən şəxs də saxlanılaraq Polis Bölməsinə gətirilib. Avtomobili oğurlayan şəxsin Qəbələ rayon sakini, əvvəllər məhkum olunmuş Vüsal Alməmmədov olması məlum olub.

Faktı araşdıran polis əməkdaşları bundan sonra daha maraqlı halla qarşılaşıblar. Araşdırma zamanı məlum olub ki, V.Alməmmədov maşını oğurlayan zaman içkili olub. O, qaçırdığı avtomobili idarə edərkən Ə.Hüseynzadə küçəsində yolun kənarında dayanmış "KİA”, "Mersedes”, "Opel” və "Dacia” markalı 4 avtomobili əzib. Hələ bu azmış kimi, o, yolu keçən paytaxt sakinləri Soltan Rəhmanovu və Asif Təhməzovu da vurub.

Xəstəxanaya yerləşdirilən S.Rəhmanova ilkin tibbi yardım göstərildikdən sonra buraxılıb, A.Təhməzovun vəziyyəti qənaətbəxşdir.

Faktla bağlı Nəsimi RPİ-də cinayət işi başlanılıb, araşdırma aparılır.

Sfera.az