Yəqin, sizin də dostluğunuzda gün ərzində azı 4-5 şəklini paylaşan, tez-tez profil şəklini yeniləyən dostunuz var, yaxud da olub.

Ona görə olub ki, bir müddətdən sonra insan bezdiyi üçün məcbur qalıb həmin şəxsi dostluğundan çıxarmalı olur. Hətta əsəbiləşib elə insanları "qara siyahıya” (bloka) atanlar da var.

Məsələnin ən çıxılmaz forması isə həmin şəxsin dost, yaxud da qohum olmasıdır. Məcbursan ki dostluqda saxlayasan. Bu zaman da maksimum dərəcədə görməzdən gəlməyə çalışırsan. Nə vaxta kimi?

Psixoloqlar bu cür halların baş verməsini həmin insanlardakı psixoloji problemlərlə əlaqələndirir.

Psixoloq Murad İsayev bildirir ki, insan depressiv vəziyyətdə olan zaman tez-tez şəkillərini paylaşır:

"Ümumiyyətlə, sosial şəbəkələr 2-3 formada istifadə olunur. Bəzi insanlar bunu iş, bəziləri isə şəxsi məqsədlərləri üçün istifadə edir. Şəxsi mənafeyi üçün istifadə edənlər tez-tez satatuslar yazır, şəkillər paylaşır. Bu tip insanların paylaşdığı şəkillərin bir-biri ilə nə dərəcədə uzlaşdığına fikir vermək lazımdır. Normalda bir insan gün ərzində 4 fərqli əhvali-ruhiyyədə şəkil paylaşırsa, bu, onun həmin gün keçirdiyi dəyişkən psixoloji durumundan xəbər verir. İkici trəfədən, paylaşılan bu şəkillər diqqət çəkmək məqsədi daşıyır.

Bilirsiniz ki, sosial şəbəkələrdə diqqət çəkməyin əsas vasitələrindən biri də qəmgin şəkillər paylaşmaqdır. Belə şəkil paylaşan zaman insanlar nə baş verdiyini öyrənmək üçün həmin insana yazıb hal-əhvalını soruşur. Yaddan çıxan insan bir anda dostların diqqət mərkəzinə çevrilir. Bunu özünütəsdiq forması kimi də qiymətləndirmək olar. Bu cür hallar həmin insanlara psixoloji güc verir. Ümiləşdirsək, sosial şəbəkədə tez-tez şəkil paylaşmaq iki halda baş verir:

1 – Depressiv vəziyyətdə olan zaman

2 –Diqqət çəkməklə daxili rahatlıq tapmaq istəyən zaman.