Top mərmilərindən üçü Tərtərin Azadqaraqoyunlu kəndinə düşüb.

Milli.Az El TV-yə (Region TV) istinadən xəbər verir ki, ötən gecə də təmas xəttində atəş səsləri səngiməyib. Ermənistan silahlı qüvvələri yenə də iriçaplı silahlar və ağır artilleriyadan istifadə ediblər. Ermənilərin axşam saatlarında atdığı top mərmilərindən ikisi Tərtərin təmas xəttindən aralıda yerləşən Azadqaraqoyunlu kəndinəki yaşayış evlərinə, biri isə əkin sahəsinə düşüb. Mərmi evə düşərkən ev sakinləri həyətdə təsərrüfat işləri ilə məşğul olduğundan heç kim xəsarət almayıb. "Heyvanları yönləşdirirdim çöldə. Qəfildən gəldi düşdü evin üstünə. Evi dağıtdı, 10 minlik keçirdi evin böyründən, onu qırdı. Qəlpələr qaz borusunu dağıtdı", - deyə Azadqaraqoyunlu kənd sakini Mirzə Rəhimov bildirib. Digər bir mərmi isə Azadqaraqoyunlu kənd sakini Kifayət Məmmədovaya məxsus evin həyətinə düşüb. Mərminin qəlpələri evə ciddi ziyan vurub. Həmin evə qonaq gələn Ülviyyə Əvəz qızı Əliyevanın üz nayihəsindən yüngül yara aldığı bildirilir. Səlahiyyətli şəxslər hadisə yerinə baxış keçiriblər.

]