"Əminəm ki, Əli Kərimlinin aksiyasına heç kim qoşulmayacaq" - Qüdrət Həsənquliyev
12:40 / 06.03.2018
3288
"Seçki Məcəlləsinə əsasən seçki təbliğatı seçkilərə 20 gün qalmış başlaya bilər. Ancaq Milli Şura adlanan qurum martın 10-da mitinq keçirmək istəyir".
Sfera.az bildirir ki, bunu Milli Məclisin bu gün keçirilən iclasında deputat Qüdrət Həsənquliyev deyib.
Q.Həsənquliyev bildirib ki, Bakı Şəhər İcra Hakimiyyəti bu aksiyanı sanksiyalaşdırıb:
"Qanunun aliliyini istəyən qrup qanunun tələblərini pozmamalıdır. Kimsə düşünməsin ki, mən bundan narahatam. Sadəcə olaraq qanunların aliliyinin tərəfdarı kimi narazılığımı ifadə edirəm. Mən heç də Əli Kərimlinin mitinqindən narahat deyiləm. Əminəm ki, onun aksiyasına heç kim qoşulmayacaq. Oqtay müəllim, Milli Məclis mitinqlə bağlı Bakı meriyasından izahat tələb etməlidir”.
Q.Həsənquliyev ölkədə sərbəst toplaşmaq azadlığının tərəfdarı olduğunu söyləyib:
"Sadəcə olaraq martın 19-dan sonra aksiyalar keçirilə bilər. Hər gün keçirsinlər. Amma bu qanunla martın 19-dan sonra həyata keçirilməlidir”.
Orxan Bəşirov
