AccessBank-ın UNEC-də reallaşdırdığı "Access Business Talks" layihəsinin budəfəki qonağı iqtisadçı-ekspert Samir Əliyev olub.

Ekspert tələbələr qarşısında "Əsas iqtisadi parametrlər" mövzusunda təqdimatla çıxış edib. İnteraktiv qaydada keçirilən təqdimat tələbələr tərəfindən olduqca böyük maraqla qarşılanıb.

Samir Əliyev ölkənin əsas makroiqtisadi göstəricilərinə toxunub və onların son illər ərzində dinamikasını tələbələrlə birgə təhlil edib. Bununla yanaşı, iqtisadçı və layihə iştirakçıları dövlət büdcəsinin əsas komponentlərinin analizini aparıblar. 

İnvestisiyalara toxunan ekspert insan kapitalına yatırımın olduqca vacib olduğunu bildirib. Bu baxımdan Samir Əliyev AccessBank-ı misal çəkib: "AccessBank təhsil sahəsində önəmli layihələr reallaşdırır. Məsələn, Bank UNEC-də reallaşdırdığı layihələri ilə gənc kadrlara investisiya qoyur və bu yatırım təqdirəlayiqdir".

Təqdimatın sonunda ekspert tələbələrin suallarını cavablandırıb.

Qeyd edək ki, 10 həftə davam edəcək "Access Business Talks" layihəsi çərçivəsində AccessBank-ın əməkdaşları, IELTS və müxtəlif iqtisadi sahələrin mütəxəssisləri tələbələrlə öz təcrübələrini bölüşür. Böyük hissəsi ingilis dilində aparılan bu çıxışların əsas məqsədi tələbələrin dil biliklərini artırmaqla yanaşı, dünyagörüşünün formalaşdırılması, biznes, maliyyə kimi sahələrdə yeni məlumatların əldə edilməsidir. 

Tələbələr üçün layihə davam etdiyi müddətdə maraqlı görüşlərlə yanaşı, bankda təşkil olunacaq ekskursiyada hər bir struktur bölmənin iş prosesi ilə yaxından tanış olmaq imkanı yaranacaq. Bundan başqa, layihə bitdikdən sonra tələbələr "AccessBank"da təcrübə proqramı keçib və müvafiq sertifikatla təltif olunacaq.