Əhəd Abıyev saytları ittiham etdi: “Özlərindən ssenari yazırlar”
12:07 / 16.02.2018
1632
"O, Aprel qazisi kimi mənə müraciət etsəydi, mən ona yüksək səviyyədə hörmət edərdim".
Sfera.az xəbər verir ki, bu sözləri Daşkəsən Rayon İcra Hakimiyyətinin başçısı Əhəd Abıyev haqqında ittihamlar səsləndirən Aprel qazisi Arzu Məmmədov barədə danışarkən deyib.
Əhəd Abıyev Aprel qazisinə əlindən gələn köməyi etdiyini:
"Arzu Məmmədov məni görməyib. Sadəcə deyib ki, İlhamə Bayramova İcra hakimiyyətinin adından məndən pul alıb. İlhamə Bayramova da, bu ittihama qarşılıq olaraq Arzu Məmmədovu rayon məhkəməsinə şikayət edib. Təkcə Arzu Məmmədovu yox, eləcə də onunla yanaşı digər dələduzları da məhkəməyə verib. Heç özüm də bilmirəm ki, bu adam niyə mənim adımı hallandırır? Onun mənə heç bir dəxli yoxdur axı. Əksinə o, Aprel qazisi kimi mənə müraciət etsəydi, (baxmayaraq ki Gəncə sakinidir) mən ona yüksək səviyyədə hörmət edərdim. Hətta biz eşidəndə ki, onun valideynləri bizim rayonun qeydiyyatındadır əlimizdən gələn köməkliyi göstərmişik. Mən tamamilə, təmiz adamam, mənlik heçnə yoxdur.
Əhəd Abıyevın sözlərinə görə, əsas təqsirləndirilən şəxs İlhamə Bayramovadır:
"Bu məsələdə İcra Hakimiyyətinə aid heç bir iş yoxdur. İlhamə Bayramovanın işinə 6 ay əvvəl xitam verilib. Arzu Məmmədov 6 aydır niyə heç bir hüqüq mühafizə orqanlarına müraciət etməyib? Mənim fikrimcə. bu kiminsə istəyi ilə, sifarişi ilə mənə şər böhtan atmaq üçün qurulmuş plandır".
Əhəd Abıyev Aprel qazisi haqqında bunları deyib:
"Onu da qeyd edim ki, kredit mütəxəssisi işləyən Arzu Məmmədov bir müddət filial müdiri vəzifəsini icra edərək ayrı-ayrı vətəndaşlara sələmə və kreditə verdiyi pullarla bağlı bankda yaratdığı ciddi problemlərə görə işdən azad edilib. Sonra da o, rayondan qaçıb gedərək hərbi hissələrin birində müddətdən artıq xidmət edən əsgər (MAXE) kimi xidmətə başlayıb. Qospitalda olduğu zaman məni onun yanına getməməkdə təqsirləndirir. Amma hər kəs bilir ki, Cənab Ali Baş komandan özü şəxsən Aprel qazilərinə baş çəkib. Kənar şəxslərin qospitala girişinə qadağan qoyulmuşdu. Heç bir İcra başçısı qospitala getməyib”.
Əhəd Abıyev bundan sonra saytlara bu barədə açıqlama verməyəcəyini də vurğulayıb:
"Saytlar özləri ssenari qurub yalan məlumatlar yazırlar. Mövzunu istədikləri kimi ssenariləşdirirlər”.
Nihat HÜSEYNZADƏ
