“Donuz qripi” təhlükəsi qapımızı döyür- Sərhədləri bağlayaqmı?
14:46 / 17.01.2019
2014
"Belə bir sərt formadan istifadə etməklə prosesin qarşısını almaq mümkün deyil”
Sfera.az-a açıqlamasında bu sözləri Gürcüstanda baş qaldıran "donuz qripi”nin hələ də lokallaşdırılmaması, onun hətta bu dövlətdə yaşayan azərbaycanlılar arasında yayılması fonunda, iki ölkə arasında sərhədin müvəqqəti də olsa bağlanmalı olub-olmaması məsələsinə münasibət bildirərkən əslən Bolnisi bölgəsindən olan iqtisadçı ekspert Natiq Cəfərli deyib.
Həmsöhbətimizin fikrincə, sadəcə olaraq sanitar-epidemoloji nəzarət daha da gücləndirilməli, sərhədi keçənlər analiz verməli, 1-2 sutkalıq karantinə alınmalıdırlar:
"Gürcüstanda "donuz qripi” ilə bağlı vəziyyət doğrudan da gərgindir. Bu fonda "donuz qripi” kəskin epidemiya xarakteri alsa, daha çox kütləviləşsə təbii ki, sərhəd-keçid məntəqələrində ən azından sanitary-epidemoloji nəzarətin ciddi şəkildə gücləndirilməsinə ehtiyac var. Yəni Gürcüstana keçən və Azərbaycana qayıdan vətəndaşların nəzarətdən keçməsi, hətta analizlərin verilməsinə ehtiyac var ki, həmin virus ölkəmizə yayılmasın. Həmçinin, müvəqqəti də olsa Gürcüstandan gətirilən ərzaq məhsullarına qadağa qoyulmalıdır. Çünki virusun ərzaq məhsulları, əsasən də ət məhsulları vasitəsilə yayılması ehtimalı da var. Ona görə də nəzarət gücləndirilməlidir”.
N. Cəfərli bu fonda sərhədin müvəqqəti də olsa bağlanmasına hələlik lüzum görmür:
"Hər halda sərhədlərin müvəqqəti də olsa bağlanması, bu istiqamətdə məhdudiyyət qoyulması kimi çox sərt addımın atılmasına hələlik ehtiyac olduğunu düşünmürəm. Bu addım dövlətrlərarası münasibətlərə də mənfi təsir göstərə bilər. Prosesin belə bir sərt formadan istifadə etməklə qarşısını almaq mümkün deyil. İndiki halda çıxış yolu nəzarətin sərtləşdirilməsi və izahat işlərinin aparılmasından keçir. Əsasən də sərhədyanı bölgələrdə yaşayanlarla ciddi profilaktik işlər aparılmalıdır. A(H1N1) virusu çox tez yayılan və kifayət qədər təhlükəli virusdur. Ona görə də ən azından sərhəd-keçid məntəqələrində sanitar-epodemoloji nəzarət ciddi şəkildə gücləndirilməlidir. Hətta müvəqqəti olaraq məcburi qaydada insanların analiz verməsi və azı 24-48 saat ərzində karantin altına alınmalarına ehtiyac var. Virus aşkarlanan şəxslər həmən digərlərilə təmaslardan uzaqlaşdırılmalıdır. Gürcüstanda baş verən proseslər onu deməyə əsas verir ki, hələlik vəziyyət düzəlməyib, əksinə daha da gərginləşməyə doğru gedir. Deməli, bu ölkədə vəziyyət hələlik lokallaşmayıb”.
Qeyd edək ki, qonşu Gürcüstanda azərbaycanlıların yığcam yaşadığı Marneuli rayonunda iki nəfər azərbaycanlı da "donuz qripi” adlanan A (H1N1) virusuna yoluxub. 59 yaşlı kişi və 39 yaşlı qadın qrip simptomları ilə rayon xəstəxanalarından birinə yerləşdiriliblər. Həkimlərin bildirdiyinə görə, həmin şəxslərin vəziyyəti ağırdır və o, reanimasiya şöbəsində müalicə olunurlar. Onların A (H1N1) virusuna yoluxması laboratoriya şəraitində təsdiqini tapıb.
Bu günə qədər Gürcüstanda yayılan "donuz qripi”ndən 17 nəfər dünyasını dəyişib.
ELÇİN