Maraqlıdır, dollara tələbin artması nə ilə bağlıdır və növbəti aylarda bunun nəticələri necə dəyişəcək?

Sfera.az bildirir ki, iqtisadçı ekspert, alim Vüqar Bayramov dollara tələbin artmasının idxalın və eləcə də büdcə xərcləmələrinin artması ilə bağlı olduğunu deyib:

 

"Monitorinqlər göstərir ki, yığımlarda da artım qeydə alınır. Mərkəzi Bankın statistikası göstərir ki, bu ilin yanvar ayında dollar satışı əvvəlki ilin uyğun ayı ilə müqayisədə də çox olub. Dövlət Gömrük Komitəsinin isə məlumatına görə bu ilin yanvar ayında idxalımız 688 milyon 625 min dollar olub. 2017-ci ilin yanvarı ilə müqayisədə bu ilin ilk ayında idxal 51% artıb. Belə ki, ötən ilin yanvar ayında idxalımız 450 milyon 36 min dollar idi. Göründüyü kimi, idxalın həcminin artması dollara tələbi artıran əsas faktordur. Digər tərəfdən, hərraclarda satılan dolların təxminən 90 faizi məhz idxal əməliyyatları üçün sifariş edilir. Bu isə o deməkdir ki, idxal birbaşa dollara olan tələbi müəyyənləşdirir. İstehlak ilə yanaşı, büdcə xərcləmələrinin artması da dollara olan tələbi artıran əsas səbəblərdən hesab edilir. Dollara tələbin cari ayda da yüksək olacağı gözlənilir”.

İqtisadçının sözlərinə görə, cari ayda dollara tələbin artmasının digər səbəbi qeyri-iş günlərinin sayının çox olması, xarici səfərlərə marağın yüksəlməsi, bayramlar ilə əlaqədardır:

 

"İdxalın artması dollara tələbatın yüksəlməsinə səbəb olacaq. Dollara tələbin yüksəlməsinə baxmayaraq milli valyutanın məzənnəsində dəyişiklik baş verməyib. Güman olunur ki, növbəti aylarda da məzənnə birbaşa Mərkəzi Bankın mövqeyindən asılı olacaq”.