- Mənim çoxlu kliplərim var və onun dəbdə olub-olmamasının önəmi yoxdur. Mən həmişə çarxlar çəkdirirəm və hətta heç düşünmürəm ki, onları hara qoyacağam. Hətta heç onu da izləmirəm ki, mənim kliplərimi telekanallar göstərir, ya yox. Mən müğənniyəm və mənim işim oxumaq, klip çəkdirmək və konsertlər verməkdir.

Son zamanlar fikir vermişəm ki, illərlə klip çəkdirməyən müğənnilər belə klip çəkdirməyə başlayıblar. Onları tez-tez çəkdirmək lazımdır ki, Azərbaycan tamaşaçıları xarici kanallara baxmasınlar.

- Gələcəkdə Türkiyə şou-biznesinin bir hissəsi olmağı düşünürsüzmü?

- Hazırda elə bir arzum yoxdur. Mənə Azərbaycan şou-biznesi də kifayətdir. Əgər gələcəkdə təklif gəlsə, bu barədə fikirləşərəm. Bildiyiniz kimi hazırda mən filmlərə də çəkilirəm. Türk müğənni və aktyor Özcan Dənizlə eyni filmdə çəkilməyi arzu edirəm. Deyə bilmərəm ki, bununla bağlı nəsə edə biləcəyəm, ya yox. Amma bunu çox istəyirəm.

- Son vaxtlar siz sosial şəbəkələrdə ən çox müzakirə edilən şəxslərdənsiz. Sosial şəbəkələrdə və KİV-də sizə məxsus olduğu iddia edilən intim çarx barədə danışırlar. Bu məsələnin sizin yaradıcılığına hər hansı təsiri olub?

- Bütün bu söz-söhbətlər sayəsində məni daha çox sevməyə başlayıblar və bir çox həmkarlarım məni dəstəkləyiblər. Mən onların hamısına minnətdaram. Bu çarx barədə danışmaq istəmirəm. Dəfələrlə müxtəlif şayiələr yayaraq mənə zərbə vurublar. Mən susuram, cavab vermirəm ki, bu cür hərəkətləri dayandırsınlar. Amma paxıllığımı çəkənlər mənə rahatlıq vermirlər. Əgər məhkəməyə müraciət eləsəm və hansısa jurnalisti cəzalandırsam, deyəcəklər ki, qalmaqal yaradıram.

Dəfələrlə deyiblər ki, mən zövqsüzəm, dinləyicilərimi təhqir ediblər. Biz hamımız başa düşməliyik ki, heç də hamı təhsilli ailədə doğulmur. Bizim kəndlərimizdə elə adamlar yaşayır ki, onlar hətta orta məktəb təhsili belə almayıblar. Ola bilsin ki, onlar hətta Üzeyir Hacıbəylinin, Mikayıl Müşfiqin kim olduğunu bilmirlər, amma mənim mahnılarıma qulaq asırlar. Heç kəsin onları buna görə ittiham etməyə ixtiyarı yoxdur. Mənim mahnılarımı təhsilli insanlar da, təhsilsizlər də dinləyir. Buna görə onlara çox minnətdaram.

Bədxahlarım belə hərəkətləri ilə təkcə mənə deyil, komandama da zərbə vurmağa çalışırlar. Onlar bilsinlər ki, nə etsələr də, məni sındıra bilməyəcəklər. Belə şayiələr sayəsində daha çox adam məni öz toylarında, tədbirlərində görmək istəyir. Martın 20-də Moskvada ,21-də Sankt-Peterburqda, 22-də isə Permdə konsert proqramı ilə çıxış edəcəyəm. Toylara gəlincə, avqust ayına qədər qrafikim doludur. Odur ki, heç kəs narahat olmasın.

- Heç bədxahlarınızdan intiqam almaq barədə düşünmüsüz?

- Yox. Onlar danışmasın deyə, mən susuram. Danışmaq gümüşdür, susmaq qızıl. Həmişə qızılı seçirəm. Qoy nə qədər istəyirlər danışsınlar, mən susacağam.