Bu, ölkədən kənara həm maliyyə axını, həm də beyin axını ilə müşahidə oluna bilər - Ekspert HƏYACAN TƏBİLİ çaldı
15:16 / 22.07.2017
977
"Təhsil haqlarının artırılmasına əsasən ölkədə baş vermiş 2 devalvasiya və enerji daşıyıcılarının qiymətlərinin artırılması təsir göstərir"
Bu sözləri Sfera.az-a təhsil haqqlarının artmasından danışarkən təhsil üzrə ekspert Kamran Əsədov deyib.
Ekspertin fikrincə, dövlət universitetləri dövlət büdcəsinin vəsaiti hesabına böyük məbləğdə pul dotasiyaları alırlar:
"Dünya təcrübəsində universitetin dövlət büdcəsinin vəsaiti hesabına saxlanılması təcrübəsi yoxdur. Bu büdcəni daima əlavə xərc yükündə saxlayır. Ona görə də, ölkə başçısı cənab prezident bu ildən etibarən bir sıra büdcədən maliyyələşən universitetlərə publik hüquqi şəxs statusu verdi ki, özləri göstərdikləri xidmətə görə maliyyələşdirilməsini həyata keçirsinlər. BDU-da bu tədris ilindən etibarən bütün fakültələr üzrə 100-500 manat arası təhsil haqları artırılıb. Bundan başqa, Xəzər Universitetində təhsil haqları 4500-5000 manat, Azərbaycan Universitetində 3000 manat müəyyən olunub ki, bu da keçən illə müqayisədə qalxıb. Amma Qərb, Kooperasiya, Odlar Yurdu universitetində təhsil haqqları aşağı düşüb. Bu da onunla əlaqədardır ki, keçən il bu universitetlər plan yerlərini çox aşağı səviyyədə doldura bilmişdilər. Təhsil haqqlarının artırılması abituriyentləri təhsil haqqları aşağı olan universitetlərə meyl etməyə məcbur edəcək ki, yenidən həmən təhsil haqqları yüksək olan universitetlərə qəbulla bağlı problemlər yarana bilər. Çünki keçid balı toplayan abituriyentlərin sayı qəbul plan yerlərindən azdır".
Ekspert qeyd edib ki, yüksək qiymətlə aşağı səviyyədə təhsil almaqdansa, ucuz qiymətə qardaş Türkiyədə daha keyfiyyətli təhsilə meyl edə bilərlər:
"Bu da ölkədən kənara həm maliyyə axını, həm də ki, beyin axını ilə müşahidə oluna bilər. Əslində isə, bu da universitetin publik hüquqi şəxs elan etməyin Azərbaycan variantı .İnkişaf etmiş ölkələrdə universitetin qazancının böyük qismini universitetin elmi fəaliyyətinin nəticəsində əldə edilmiş pullar təşkil edir . Necə ki, bizdə təhsil elmə çevrilməyib qazanc yeri yenə də millətin belindən, zəhmətkeş fəhlənin, kəndlinin əlinin qabarından çıxacaq. Öyrəşmişik ki,əziyyətsiz qazanc əldə edək. Bir başınızı işlədin yeni gəlir mənbələri axtarın "rasxod" çıxarmağın yolu ancaq millətdir".
Azər Salam
Sfera.az