Bu ölkədə 2 milyon pişiyin öldürülməsi barədə qərar çıxarıldı
15:09 / 29.04.2019
2789
Avstraliya hökuməti havadan zəhərli sosislər atmaqla, 2 milyon vəhşi pişiyi qətlə yetirməyi planlaşdırır. 2020-ci ilə qədər zəhərlənməkdən əlavə, pişiklərin tələyə salınaraq və güllələnərək kütləvi surətdə qırılmasını nəzərdə tutanın planın məqsədi yerli heyvan növlərini qorumaqdır.
İlk dəfə avropalı müstəmləçilərin gəlməsi ilə Avstraliyada ortaya çıxan vəhşi pişiklər qitədə 20 məməli növünün nəslinin kəsilməsinə səbəb olublar. Bu sözləri Avstraliyanın nəsli kəsilmək təhlükəsi olan heyvanları qoruma komissiyasının rəhbəri Qreqori Endryus deyib
Onun sözlərinə görə, vəhşi pişiklər Avstraliyanın yerli heyvanları üçün "yeganə ən böyük təhlükəyə” çevriliblər:
"Biz indi sevdiyimiz heyvanları və bizi bir ölkə kimi fərqləndirən bilbi, varru və gecə tutuquşusunu qorumaq üçün seçim etmək məcburiyyətindəyik”.
Avstraliyada vəhşi pişiklərin hər il 377 milyon quş və 649 milyon sürünəni ovladıqları bildirilir.
Plana qarşı təbii ki, etiraz edənlər də çoxdur. 160, 000 dən çox insan petisiya imzalayaraq Avstraliya hökumətindən planı dayandırmağı tələb edib.
Bəziləri Avstraliya hökumətinin təkcə vəhşi pişiklərə fokuslandığını, şəhərləşmənin, meşələrin qırılmasının və mədənçilik kimi bioçeşidliliyi məhv edən faktorları nəzərə almadığını deyirlər.
Bununla belə, Avstraliya hökuməti vəhşi pişiklərin kütləvi qətlini yerinə yetirmək planında tək deyil. Yeni Zelandiya da belə bir plan hazırlayıb.
Ölkə 2050-ci ilə qədər bölgənin təbiətinə məxsus olmayan vəhşi pişiklərdən qurtulmağı qarşısına məqsəd qoyub. Keçən il Cənubi Ada bölgəsindəki bir şəhərdə insanlara pişik saxlamaq qadağan edilib.Bilge.az