"Beynəlxalq Muzeylər Günü” Beynəlxalq Muzeylər Şurasının (İCOM) təşəbbüsü ilə 1977-ci ildən etibarən 18 may tarixində qeyd edilir. Bu bayram bir qayda olaraq xalqlar arasında mədəni mübadilə və əməkdaşlığın inkişafına kömək şüarı ilə keçirilir. Muzeylər mənəvi dəyərləri toplayan, qoruyan və təbliğ edən müəssisələrdir. Respublika muzeylərində bu baxımdan çox böyük iş aparılır. Həmin gün bütün muzeylərimizdə bu peşə bayramı qeyd edilir.

Son illər aparılan quruculuq işləri Azərbaycanda muzeylərə marağı artırıb. Bu gün ölkəmizdə 250-dən artıq muzey var. İlk dövlət muzeyimiz 1919-cu ildə Bakıda (İstiqlal Muzeyi), ilk memorial muzey isə 1940-cı ildə Şəkidə (M.F.Axundovun ev-muzeyi) fəaliyyətə başlayıb. Respublika üzrə  respublika ümumilikdə 44 ev-muzeyi fəaliyyət göstərir. Ermənistanın ölkəmizə təcavüzü nəticəsində 100 mindən artıq əşyanın toplandığı 22 muzey isə işğal olunmuş ərazilərdə qalıb.