Millət vəkili Fazil Mustafanın ictimai nəqliyyatda şagirdlər üçün gediş haqqının ləğv edilməsi təklifi gündəmin əsas mövzularındandır. Mövzuyla bağlı Bakı Nəqliyyat Agentliyinin (BNA) mövqeyini öyrənməyə çalışdıq.

Sfera.az əməkdaşının ötən gün BNA-ya etdiyi telefon zənginə cavab verən qeydiyyat şöbəsinin əməkdaşı mətbuat katibinin iş başında olmadığını bildirərək, işə qayıtdıqdan sonra zəngimizlə bağlı onu məlumatlandıracağını söylədi. Bir neçə saat gözləsək də BNA-nın mətbuat xidmətindən yenə səs çıxmadı.

Daha sonra BNA mətbuat xidmətinin rəhbəri Mais Ağayevin şəxsi telefon nömrəsini taparaq onunla əlaqə saxladıq. Mais Ağayev sualımızı eşidən kimi "məlumatımız var, bir qədər sonra məsələ ilə bağlı mətbuata ümümi açıqlamamız olacaq” deyərək telefonu qapatdı. Ötən gün gözləntilərimizin əksinə olaraq BNA-dan heç bir açıqlama gəlmədi.

Bu gün isə Mais Ağayevə dəfələrlə zəng etsək də mətbuat xidmətinin rəhbəri telefona cavab vermədi.

Mətbuat xidmətinin rəhbəri "daşı ətəyindən töküb” açıqlama vermək fikrinə düşərsə məsələylə bağlı BNA-nın da mövqeyini dərc etməyə çalışacağıq.

Səbuhi

Sfera.az