“Bir hissəsi qəzalarda, bəziləri hərbi qulluqda ölür...” – Sosioloq yeni doğulanlar arasındakı qız-oğlan nisbətindən danışdı
13:27 / 08.07.2021
1235
"Azərbaycanda
hər yeni doğulan 100 qıza 114 oğlanın düşməsinin birmənalı olaraq mənfi tendensiya
kimi qələmə verilməsi düzgün deyil”.
Bunu Sfera.az-a açıqlamasında sosioloq Əhməd Qəşəmoğlu
son günlər sosial mediada qız uşaqlarının abortu ilə bağlı gedən müzakirələrə
münasibət bildirərkən deyib.
Müsahibimiz qeyd edib ki, valideynin öz
uşağının qatili olması mənəvi, psixoloji cəhətdən qəbuledilməzdir:
"Kobud desək, ata-ana öz övladını öldürmək qərarına
gəlir. Neçə aylıq olmasından asılı olmayaraq, artıq onların öz övladıdır. Nəticədə
bu addımı atmaq (abort) valideynlərə mənəvi zərbə vurur, daxillərində mənfi
enerji formalaşır. Bu baxımdan statistik göstəriciləri yaxşı hesab etmək olmaz.
Lakin camaatın hay-küy salması, "ölkədə evlənməyə qız tapılmayacaq”, "oğlanlar
çoxalacaq, qızlar azalacaq” kimi fikirlər tamamilə boş , mənasızdır. Demoqrafik
cəhətdən qorxulu nəsə yoxdur.
Əksinə, ölkədə oğlanların çox doğulmağı yaxşı
haldır. Çünki oğlanlar bir az böyüyəndən, orta məktəbi bitirəndən sonra bir
çoxu ölkədən çıxıb gedir. Bir hissəsi yollarda qəzalar nəticəsində ölür. Gün ərzində
bədbəxt hadisələrdən ölənlərin statistikasına nəzər salsaq, aralarında
oğlanların daha çox olduğunu görərik. Eyni zamanda müharibə zamanı, əsgərlik
vaxtı onlar dünyasını dəyişir”.
Sosioloqun sözlərinə görə, əgər oğlanlarla
qızların sayı eyni olsaydı, problem yaranardı: "Oğlanların çoxluğu
arzuolunandır, amma müəyyən həddə qədər. 114 rəqəmi pis deyil, amma 120-ni keçsə,
yaxşı olmaz. Elə 115 sonuncu sərhəddir. Bu məsələlər haqqında danışanda hansı cəhətdən yaxşı və ya pis olmasına diqqət
etmək lazımdır. Hələlik indiki vəziyyət SOS siqnalı çalmağa əsas vermir”.
