Beynəlxalq Bank ilə İqtisadi İslahatların Təhlili və Kommunikasiya Mərkəzi arasında memorandum imzalandı
16:21 / 25.09.2019
1782
Azərbaycan Respublikası İqtisadi İslahatların Təhlili və Kommunikasiya
Mərkəzində keçirilən "Startap ekosistemi: çağırışlar, perspektivlər və həllər”
mövzusunda ekonoton zamanı Azərbaycan Beynəlxalq Bankı ilə Mərkəz arasında
Anlaşma Memorandumu imzalanıb.
İqtisadi İslahatların Təhlili və Kommunikasiya Mərkəzinin icraçı direktoru Vüsal
Qasımlı bildirib ki, belə bir əməkdaşlıq ölkəmizdəki sahibkarlıq subyektlərinin ixrac
imkanlarının artırılmasına, bu sahədə innovativ inkişafa, elektron ticarətin
genişlənməsinə, maliyyə resurslarına çıxış imkanlarının artmasına kömək göstərəcək:
"Azərbaycan bu sahələrdə çox böyük potensiala malikdir. Bu potensialın
reallaşdırılmasından ötrü ayrı-ayrı istiqamətlərdə fəaliyyətlərin əlaqələndirilməsi
zərurəti var. Azərbaycan Beynəlxalq Bankı ilə çoxşaxəli əməkdaşlığı nəzərdə
tutan memorandum da bu məqsədə xidmət edir”.
Azərbaycan Beynəlxalq Bankının İdarə Heyətinin sədri Abbas İbrahimov isə
İqtisadi İslahatların Təhlili və Kommunikasiya Mərkəzinin bu gün ölkəmizdə aparılan
iqtisadi islahatların monitorinqi, ixracın dəstəklənməsi sahəsində reallaşdırdığı
layihələrin bank üçün mühüm əhəmiyyət kəsb etdiyini bildirib: "Mərkəzlə əməkdaşlıq
çərçivəsində xüsusən ixracla məşğul olan müştərilərimiz arasında bu sahədə təlim
və maarifləndirmə işləri aparılacaq. Bu əməkdaşlıq bir sıra innovativ bank
məhsul və xidmətlərinin yaradılmasına imkan verəcək. Mərkəzlə birgə marketinq
tədqiqatlarının aparılmasına, faydalı məlumat mübadiləsinə şərait yaradacaq.
Eyni zamanda, fərdi sahibkarlar arasında nağdsız ödənişlərin stimullaşdırılması
məqsədilə birgə layihələrin icrasına da kömək göstərəcək”.
İmzalanma mərasimindən sonra maliyyə resurslarının yerli startaplar üçün
əlçatanlıq səviyyəsi, bu sahədə mövcud olan problemlər, beynəlxalq bazarlara çıxış,
startaplar üçün vergi sistemi, startaplarla investorların görüşü, yerli investorların
startaplara investisiya qoyuluşuna təşviqi və s. mövzular ətrafında geniş müzakirələr
aparılıb.