\"Bərzaninin bu gün verdiyi açıqlama..\" - ŞƏRH
Bu gün İraq Kürdüstanında referendum başlayıb. Bölgədəki bütün dövlətlərin etirazına baxmayaraq, Şimali İraq Kürd Muxtariyyatı müstəqillik üçün referenduma səhər saatlarında start verib. Yerli vaxtla 08:00-da referendum başlayıb. Ərbildə bayram abu-havası hökm sürür. Artıq seçicilər məntəqələrə axışmağa başlayıblar. Keçirilən referendum Sfera.az-a şərh edən siyasi analitik Vüqar Zifəroğlu deyib ki, referendumun keçirilməsi hələ sabahısı gün Kürdüstan adlı dövlətin elan ediləcəyini ifadə etmir: |
"İraq Bölgəsəl Kürd Yönətiminin baş naziri Neçirvan Barzaninin elə bu gün verdiyi açıqlama da bu fikri təsdiqləməkdədir. Kürd yönətimi rəsmisi, Türkiyəyə şükranlıq borcu olduqlarını bildirərək, referendumuin əsla 26 sentyabrda yeni dövlətin elan ediləcəyi demək olmadığını vurğulayib. Mümkündür ki, Bərzani özünü saldığı bu mürəkkəb vəziyyətdən çıxış yolu kimi sadəcə olaraq referendumun nəticələrinin qərara bağlanmasını qeyri-müəyyən zaman üçün ertələsin. Qeyd etmək lazımdır ki, bölgə dövlətərinin bu məsələdə kifayət qədər sərt tutum sərgiləmələri, Qərbi də daha loyal mövqe sərgiləməyə vadar etdi”. |
Diqqət etsək
görərik ki, referendumla bağlı açıqlamalarında istər avropalılar, istərsə də
ABŞ rəsmiləri artıq daha ehtiyatlıdırlar:
"Onlardan fərqli olaraq Türkiyə və İran isə təzyiqlərini artırmaqdadırlar. Əslində referendum keçirilməsi faktının özü artıq, Qərbin manevr imkanlarını artırır və bundan daha qabağa getmək indiki şəraitdə onlara lazım deyil. Qərb onsuz da refendemin nəticələri ilə rəsmi Tehranın nəzarətində olan rəsmi Bağdada, həm də kürd məsələsinə son dərəcə həssas yanaşan Ankaraya təzyiq rıçaqları əldə edəcək. İraq və Suriyada son dərəcə mürəkkəb siyasi vəziyyətin yaşandığı, ərəb ölkələrinin sürətlə İsraillə yaxınlaşdığı və buna paralel olaraq Yaxın Şərqdə xarici şərtlərin təsiri ilə Rusiyanın da dəstəklədiyi Türkiyə-İran duetinin formalaşdığı bir zamanda Qərbin bu məsələdə daha da uzağa getməsi, belə deyək, referendumun nəticəsi olaraq Kürdüstan adlı bir dövlətin varlığını elan etdirməsi (!) daha ciddi və vahim qarşıdurmaların yaşanmasına təkan verəcək. Nə Vaşinqton, nə də qoca qitə isə buna hazır deyil”.
Azad Əliyev
Sfera.az