“Bəli, bunun adı Zəfərdir!” – PA rəsmisi ordumuzun uğurlu hərbi əməliyyatlarından yazdı
"1994-cü ildə atəşkəs haqqında saziş imzalandıqdan bəri Azərbaycan və Ermənistan arasında ən şiddətli döyüş hesab edilən 2016-cı il aprel savaşı Azərbaycan Silahlı Qüvvələrinin qələbəsi ilə nəticələnmiş, Tərtər rayonunun Talış kəndi ətrafındakı yüksəkliklər və Seysulan kəndi, Cəbrayıl rayonunun Lələtəpə yüksəkliyi və Cocuq Mərcanlı kəndi, Goranboy rayonunun Gülüstan kəndi, Tərtər rayonunun Qazaxlarkəndi və Tərtər rayonunun Madaqiz kəndi istiqamətində yollar düşməndən azad olunmuşdur. Ümumulikdə isə müzəffər ordumuzun düşmənə endirdiyi amansız və sürətli zərbələr nəticəsində 2000 hektar ərazimiz düşmənin varlığından arındırılmışdır. Bəli, bunun adı Zəfərdir!”.
Sfera.az xəbər verir ki, bu sözləri özünün facebook hesabında Prezident Adminstrasiyasının rəsmisi Bəhruz Həsənov yazıb. 2018-cı il may ayında Azərbaycan ordusunun uğurla həyata keçirdiyi əməliyyat nəticəsində Şərur rayonunun Günnüt kəndi, "Ağbulaq" yüksəkliyi, Qızılqaya dağı, Qaraqaya dağı erməni işğalından azad edilməsini, Dərələyəz mahalının Arpa kəndi isə Azərbaycan ordusunun nəzarəti altına keçməsini xatırladan Bəhruz Həsənov həmin hərbi əməliyyatların ölkəmiz üçün əhəmiyyətini belə izah edib:
"Ümumi olaraq, 11,000 hektarlıq ərazi işaldan azad olunmuş və bu əməliyyat Azərbaycan Silahlı Qüvvələrinə İrəvan-Yeğeqnadzor-Gorus-Laçın-Xankəndi avtomobil yoluna nəzarət etməyə imkan yaratmışdır. Bədxahların nəzərinə, bunun adı Zəfərdir!
Zəfəri danmaq isə namərdlikdir, şəhidlərimizin ruhuna hörmətsizlikdir, düşmən ilə eyni bulağın gözündən su içməkdir.
Hər nə qədər dövlətimizin, ordumuzun şanlı zəfərlərinə kölgə salmağa cəhd edən, onların miqyasını kiçiltməyə çalışan "sapı özümüzdən olan baltalar" olsa da, hər nə qədər hakimiyyətə müxalifik deyib, dövlətə qarşı düşmənçilik edənlər olsa da, Azərbaycan xalqı cənab Ali Baş Komandanın rəhbərliyi altında yeni-yeni zəfərlər qazanacaq, yeni-yeni uğurlara imza atacaq.
Uğurlarımız bol, zəfərlərimiz mübarək olsun!”